Örn Óskarsson, pípulagningameistari og fyrrverandi landsliðsmaður í knattspyrnu, lést á Landspítalanum í Fossvogi 25. nóvember síðastliðinn, 72 ára að aldri, eftir langvarandi veikindi.

Örn fæddist í Vestmannaeyjum 18. febrúar 1953 og ólst þar upp. Foreldrar hans voru Óskar Ólafsson pípulagningameistari frá Vestari-Torfastöðum í Fljótshlíð og Kristín Jónsdóttir húsfreyja, frá Hafnarnesi í Fáskrúðsfirði. Hann var næstyngstur í hópi tíu systkina.

Eftir að hafa lokið skólagöngu í heimabyggð lærði hann pípulagnir hjá föður sínum og starfaði við það bæði í Vestmannaeyjum og síðar í Reykjavík þegar fjölskyldan fluttist þangað.

Örn var afburða íþróttamaður á unglingsárum, bæði í frjálsum íþróttum og fótbolta, og setti Íslandsmet í hlaupi og spjótkasti. Að lokum ákvað hann að helga sig fótboltanum og varð einn markahæsti leikmaður landsins. Hann átti farsælan feril með ÍBV og skoraði alls 81 mark í 171 leik á Íslandsmótinu, þar af 56 mörk í 152 leikjum í efstu deild. Með ÍBV varð hann bikarmeistari árið 1972 og Íslandsmeistari 1979 og var markakóngur í 2. deild 1976. Frægur er leikur gegn Selfossi 14. ágúst 1976 þar sem hann skoraði sex mörk og gekk síðar sama dag í hjónaband.

Sumarið 1977 lék hann með KR og var markahæstur hjá liðinu. Hann gerðist atvinnumaður hjá Örgryte í Svíþjóð árið 1980 og lék þar í tvö tímabil, hið síðara í sænsku úrvalsdeildinni. Hann lauk knattspyrnuferlinum með Þrótti í Reykjavík 1983–1986.

Örn átti 23 landsleiki með A-landsliðinu á árunum 1972 til 1982 og skoraði eitt mark. Þótt hann hafi mest leikið sem sóknarmaður, spilaði hann síðar sem bakvörður hjá landsliðinu.

Eftirlifandi eiginkona hans er Hulda G. Kjærnested, fædd 1955. Dætur þeirra eru Margrét, fædd 1974, og Sara Kristín, fædd 1984. Barnabörnin eru sex talsins.

Útför Arnar fer fram í Guðríðarkirkju mánudaginn 4. desember klukkan 15.

Mbl.is sagði frá andlátinu.