Einar Jóhannes Guðnason, varaþingmaður og bæjarfulltrúi Miðflokksins í Kópavogi, lýsir yfir furðu sinni á hönnun nýrrar brúar á Arnarnesvegi á fundi bæjarráðs Kópavogs í dag. Hann segir að meirihlutinn í Kópavogi hafi ekki beitt sér opinberlega fyrir skynsamri útfærslu brúarinnar.
„Hver leyfði þessari vitleysu að gerast?
Á fundi bæjarráðs í morgun var lögð fram árshelmingsskýrsla Betri samgangna, var Arnarnesvegurinn m.a. nefndur í henni.
Undirritaður nýtti tækifærið og lagði fram eftirfarandi bókun til að lýsa furðu sinni á útfærslu vegarins. Þann hluta bókarinnar má lesa hér:
„Kópavogsbúar finna nú fyrir óskiljanlegri hönnun nýrrar brúar á Arnarnesvegi. Meirihlutinn hefur vísað ábyrgðinni til Vegagerðarinnar þótt Kópavogsbær hafi sérstaklega samið um að flýta framkvæmdinni og notað hana sem rök fyrir samþykki Borgarlínu, með tilheyrandi þrengingu að fjölskyldubílnum. Kópavogsbær hefur ekki beitt sér opinberlega fyrir skynsamari útfærslu brúarinnar. Færsla umferðarljósanna frá Ögurhvarfi að nýjum gatnamótum Arnarnesvegar og Breiðholtsbrautar leysir ekki umferðarvandann heldur færir hann.“
Stórum áfanga náð
Ný brú yfir Breiðholtsbraut milli Jaðarsels í Reykjavík og Vatnsendahvarfs í Kópavogi var opnuð 9. júlí síðastliðinn.
Í tilkynningu frá Vegagerðinni segir að opnun brúarinnar sé stór áfangi í framkvæmdum við nýjan Arnarnesveg milli Rjúpnavegar í Kópavogi og Breiðholtsbrautar.
Samhliða þessu hafa gatnamótum Vatnsendahvarfs og Breiðholtsbrautar verið lokað, umferðarljós þar fjarlægð og skipulagi gatnamótanna breytt. Áætlað er að þau verði opnuð í breyttri mynd síðla hausts.
Krefst svara frá Reykjavíkurborg
Einar er ekki sáttu og bætir við að miðflokkurinn krefjist svara hvort Reykjavíkurborg hyggist beita sér fyrir úrbótum á umferðaflæði svæðisins.
„Miðflokkurinn krefst skýringa á því hvers vegna meirihlutinn stóð ekki fastar í lappirnar gagnvart meintu ofríki Reykjavíkurborgar og hvort hann hyggist beita sér fyrir varanlegum úrbótum á umferðarflæði svæðisins.
Meirihlutinn brást við með því að kalla þetta mikla samgöngubót fyrir efri byggðir Kópavogs, þó það sé rétt að umferð muni að einhverju leyti dreifast, þá afsakar það ekki þetta fyrirsjáanlega skipulagsslys og hefði þessi brú getað raunverulega leyst vandann.
Meirihlutinn hefur þó séð ljósið og viðurkennir nú að endurskoða þurfi ljósin við enda brúarinnar.
Við munum sjá til þess að sú endurskipulagning fari fram.“
