Uppnám varð á hafnaboltaleik New York Yankees og New York Mets á Yankee Stadium í New York á föstudagskvöld þegar maður hljóp inn á völlinn með palestínska fánann.

Atvikið átti sér stað í sjöundu lotu leiksins og þurfti að stöðva leikinn tímabundið á meðan öryggisverðir eltu manninn um útivöllinn. Hann klæddist hafnaboltatreyju með áletruninni „No Kings“ og veifaði palestínska fánanum á hlaupum.

Öryggisverðir náðu manninum að lokum, felldu hann til jarðar og héldu honum þar áður en hann var leiddur af vellinum. Fjöldi áhorfenda brást við með því að hrópa „USA“ og samkvæmt bandarískum fjölmiðlum köstuðu einhverjir þeirra bjórdósum í átt að manninum.

Atvikið vakti sérstaka athygli þar sem leikurinn fór fram á 25 ára afmæli hryðjuverkaárásanna 11. september 2001. The Athletic greinir frá því að maðurinn hafi hlaupið inn á völlinn nákvæmlega klukkan 21:11 að staðartíma.

Lögreglan í New York segir manninn vera 38 ára gamlan. Hann var handtekinn og sakaður um ólöglega inngöngu á völlinn auk brots gegn staðbundinni reglugerð.

Maðurinn, sem heitir Kelly Marcucci, fékk fyrirmæli um að mæta fyrir dómstóla síðar vegna málsins og var síðan látinn laus.