Pentagon birti í gær nýjan bunka skjala um óþekkt fljúgandi fyrirbæri (UFO), eða svokölluð óþekkt óvenjuleg fyrirbæri (UAP). Þar á meðal er skýrsla frá herflugmanni sem segir að dularfullt fyrirbæri sem hann varð vitni að hafi verið „ólíkt öllu sem ég hafði séð“ á 28 ára ferli sínum.
Alls voru 40 skjöl birt, þar á meðal 14 skýrslur, 19 myndskeið, fjórar hljóðupptökur og þrjár ljósmyndir. Gögnin koma meðal annars frá bandaríska varnarmálaráðuneytinu, NASA, CIA, FBI og orkumálaráðuneytinu.
Gögnin hafa verið birt á sérstökum UAP-vef Pentagon samkvæmt forsetatilskipun sem Donald Trump undirritaði fyrr á þessu ári.
Dularfullur hlutur yfir kjarnorkuverksmiðju
Meðal athyglisverðustu skjalanna er skýrsla frá orkumálaráðuneyti Bandaríkjanna um óþekktan hlut sem fór inn í lokaða lofthelgi yfir kjarnorkuvopnaverksmiðjunni Pantex nærri Amarillo í Texas í september 2015.
Tveir öryggisverðir veittu fyrirbærinu eftirför á meðan svæðið var sett í neyðarlokun.
„Þótt þeir næðu ekki að komast nær hlutnum stöðvuðu þeir bifreið sína og fóru út. Þá tóku þeir eftir því að hluturinn gaf ekki frá sér hljóð. Auk þess gátu þeir ekki greint neins konar knúningskerfi þegar þeir skoðuðu hann með sjónauka,“ segir í skýrslunni.
Eftir að hafa fylgst með fyrirbærinu í eina til tvær mínútur hélt það áfram norður fyrir svæðið.
„Ólíkt öllu sem ég hafði séð“
Um helmingur nýju gagnanna er frá árinu 2010 eða síðar. Þar má meðal annars sjá innrauð myndskeið sem tekin voru úr herflugvélum yfir Kyrrahafinu, Atlantshafi og Miðausturlöndum.
Ein skýrslan fjallar um atvik yfir Atlantshafi árið 2020. Þar lýsir áhafnarmeðlimur bandaríska sjóhersins dökkrauðleitum hlut sem var um fjórir til fimm metrar á hæð.
„Útlitslega líktist hann stórri og nokkuð aflagaðri blöðru, en við gátum ekki staðfest það þegar við fórum fram hjá honum,“ skrifaði hann.
Í annarri skýrslu lýsir herflugmaður atviki sem átti sér stað yfir austurhluta Bandaríkjanna árið 2019.
„Ég tók eftir hlut með flugeiginleika sem voru ólík öllu sem ég hafði séð á 28 árum mínum í þjónustu flughersins og sjóhersins,“ skrifaði hann.
Hann segir lítinn hlut hafa flogið á miklum hraða í gagnstæða átt við flugvél þeirra.
„Ég fylgdist með honum í um 10–15 sekúndur áður en við hófum upptöku. Þegar ég stækkaði myndina til að fá betri upplausn fór hluturinn út fyrir sjónsviðið vegna hraðans og mér tókst ekki að finna hann aftur.“
Við nánari greiningu eftir flugið virtist hluturinn vera ferhyrndur.
„Aðrir með jafn mikla eða meiri reynslu voru einnig óvissir um hvað þetta gæti hafa verið,“ segir í skýrslunni.
Nýjustu atvikin nálægt Kína
Nýjustu gögnin eru frá árinu 2025 og tengjast aðgerðum bandaríska Indó-Kyrrahafshersins nærri Kína.
Í einu myndskeiði sést hernemi fylgjast með fyrirbæri sem lýst er sem „svæði með birtuskilum sem líkist sexarma stjörnu“ yfir Gulahafinu.
Annað myndskeið sýnir óþekktan hlut sem fylgst var með í nokkrar mínútur yfir Austur-Kínahafi.
Dularfullar „grænar eldkúlur“
Í gögnunum er einnig fundargerð frá ráðstefnu árið 1949 í Los Alamos í Nýju-Mexíkó þar sem fremstu eðlisfræðingar og vísindamenn Bandaríkjanna, þar á meðal þátttakendur í Manhattan-verkefninu, ræddu svokallaðar „grænar eldkúlur“ sem höfðu sést yfir kjarnorkurannsóknarstöðinni þar.
Ein kenning var sú að um loftsteina væri að ræða, en þekktur stjörnufræðingur hafnaði þeirri skýringu.
„Ekkert þessu líkt hefur nokkru sinni sést þegar loftsteinar falla til jarðar,“ sagði hann.
Pentagon segir að þetta sé ekki síðasta birting gagna samkvæmt forsetatilskipuninni.
„Varnarmálaráðuneytið og samstarfsstofnanir þess vinna nú að næstu birtingu UAP-gagna,“ sagði talsmaður ráðuneytisins, Sean Parnell.
