Bandaríska varnarmálaráðuneytið birti í dag annan skammt af áður leynilegum skjölum sem tengjast meintum fljúgandi furðuhlutum, þar á meðal skýrslur sem lýsa óútskýrðum grænum hnöttum, diskum og eldhnöttum.

Birtingin kemur í kjölfar fyrri gagnabirtingar sem fyrirskipuð var af Donald Trump, en fyrsti pakkinn af skjölum var gerður opinber 8. maí.

Trump er þar með nýjasti forseti Bandaríkjanna til að heimila birtingu opinberra gagna um óþekkta fljúgandi hluti og heldur áfram ferli sem hófst seint á áttunda áratugnum.

Pete Hegseth varnarmálaráðherra, sagði að gögnin sem nú hefðu verið birt, þar á meðal skjöl, ljósmyndir og myndbönd af því sem opinberlega er kallað „óþekkt afbrigðileg fyrirbæri“, hefðu lengi verið tilefni vangaveltna almennings.

„Það er kominn tími til að bandaríska þjóðin sjái þetta sjálf,“ sagði hann í yfirlýsingu.

Meðal þeirra 222 skráa sem birtar voru í dag er eitt 116 blaðsíðna skjal sem lýsir í smáatriðum röð tilkynntra atvika og tengdra rannsókna sem gerðar voru í leynilegri aðstöðu í Sandia í Nýju-Mexíkó á árunum 1948 til 1950.„Þessi skrá inniheldur 209 tilkynningar um „græn ljós“, „diska“ og „eldhnetti“ sem sáust nálægt herstöðinni,“ sagði varnarmálaráðuneytið.

Sérfræðingar sem fóru yfir fyrri skýrslur tóku fram að þótt þær innihéldu nýtt myndefni af áður þekktum tilvikum, veittu þær ekki óyggjandi sannanir fyrir geimtækni eða lífi utan jarðar.