Fréttamenn sjónvarpsstöðvar urðu sjálfir að fréttaefni þegar ráðist var á þá við störf í Chicago í Bandaríkjunum síðdegis á mánudag. Þrír menn voru handteknir í kjölfar atviksins og eru yfirheyrðir af lögreglu.

Fréttamaður og tökumaður frá CBS voru að undirbúa beina útsendingu. Samkvæmt upplýsingum lögreglu ók dráttarbíll upp að fréttabíl stöðvarinnar og stöðvaði fyrir framan hann.

Lögregla segir að einn mannanna hafi stigið út úr dráttarbílnum með hund og skipað dýrinu að ráðast á fréttamennina um leið og hann hatursfull orð falla í þeirra garð. Vitni segja að tveir aðrir menn úr bílnum hafi einnig komið út og tekið þátt í uppákomunni.

Þegar hundurinn réðst ekki að fréttafólkinu varð einn mannanna æstur, að sögn lögreglu og vitna. Hann er sagður hafa eyðilagt sjónvarpsmyndavél tökumannsins og brotið framrúðu fréttabílsins með umferðarkeilu.

Eftir skemmdarverkin flúðu mennirnir af vettvangi á dráttarbílnum.

Lögregla í Chicago hafði í kjölfarið uppi á þremur einstaklingum sem taldir eru tengjast málinu. Þeir eru nú í haldi til yfirheyrslu, en ekki hefur verið gefin út formleg ákæra á hendur þeim. Enginn slasaðist í árásinni.

Rannsókn málsins stendur yfir og lögregla vinnur nú að því að afla frekari gagna, meðal annars með því að yfirfara framburði vitna og önnur sönnunargögn. Ekki hefur verið upplýst hvað vakti fyrir mönnunum, annað en að lögregla telur að kynþáttaníð hafi verið hluti af árásinni.