Áhrifavaldurinn Kristján Einar Sigurbjörnsson eða Kleini eins og hann kallar sig, hefur síðustu ár verið einn umtalaðasti maður landsins og hefur reglulega ratað á slúðursíður fjölmiðlanna, meðal annars fyrir ástarsambönd sín og ríkmannlegan lífsstíl sem stundum hefur vakið spurningar. Þá komst hann einnig í fréttirnar þegar hann var sýknaður í Landsrétti af líkamsárás árið 2021 og þannig snúið við dómi Héraðsdóms Reykjavíkur sem hann hafði fengið 2019. Þá sat hann inni í átta mánuði á Malaga á Spáni fyrir alvarlegt brot, sem hann gerði sjálfur lítið úr og hélt áfram að njóta jákvæðrar athygli eins og ekkert hefði í skorist.

Samkvæmt Morgunblaðinu er Kleini einn þeirra þriggja manna sem handteknir voru á Akureyri um helgina vegna hrottafengis kynferðisbrots á ungri konu.

Mannlíf fer nú yfir frægðarsól Kleina og fall hans af stalli sem hann reisti sjálfur með hjálp fjölmiðlanna.

„Rómantískur“ sjómaður

Í janúar 2021 birtist forsíðuviðtal við Kleina í kynningarblaði Fréttablaðsins, Fólk, þar sem honum er lýst sem rómantískum sjómanni. Þá hafði hann hafið ástarsamband með Svölu Karítas Björgvinsdóttur stórsöngkonu ári áður, en aldursmunur þeirra var töluverður eins og fyrirsögn viðtalsins vísaði í: Ástin spyr ekki um aldur. „Það er enginn vafi á því að ég mun aldrei elska neina eins og ég elska Svölu. Í henni hitti ég sálufélaga minn og ég trúi því að ef maður er heppinn, þá gerist slíkt bara einu sinni á lífsleiðinni,“ segir Kleini í upphafi viðtalsins en þar ræðir hann einnig um þá fordóma sem mætti þeim vegna aldursmunarins.

Þá útskýrir hann gælunafnið Kleini en það ku hafa komið til vegna þess að hann stundaði kleinustuld þegar hann bakaði með ömmu sinni sem krakki. „Þegar ég var yngri átti ég það oft til að hjálpa ömmu Svönu að baka kleinur og segjum sem svo að ef við ætluðum að baka hundrað kleinur varð hún alltaf jafn hissa þegar aðeins sjötíu kleinur skiluðu sér úr bakstrinum. Eftir að föðurbróðir minn sá mig svo stela kleinum hægri, vinstri, ákvað hann að byrja að kalla mig Kleina og það bara festist við mig.

Þegar Kleini var 19 ára eignaðist hann dóttur sem hann sagði hafa breytt lífi sínu til hins betra. „Dóttir mín er eitt það besta sem hefur komið fyrir mig og mig langar að eignast fleiri börn í framtíðinni,“ sagði Kleini í viðtalinu. Þar kemur einnig fram að hann hafi alist upp í miklum útgerðarbæ, Húsavík, en þegar viðtalið birtist hafði hann verið fimm ár á sjó í Reykjavík en hann sagði sjóinn „núllstilla“ sig og „herða.“

Hégómafulli áhrifavaldurinn

Eftir að Kleini hóf samband með Svölu reis frægðarsól hans hátt en hann var duglegur að birta myndir af sér á Instagram, sem sýndi ákveðinn flottræfilshátt ef svo má kalla, rándýr föt, dýrar græjur og vöðvastæltan og húðflúraðan kroppinn. Inn á milli birti hann einhvers konar grín þar sem hann var í aðalhlutverki.

Tæplega 7.500 manns fylgja honum á Instagram í dag, megnið af þeim ungt fólk sem oft dáðist oft að Kleina í athugasemdum, ýmist að ásýnd hans eða fasi. Þá hefur hann í gegnum tíðina verið duglegur að svara spurningum í story á Instagram, þar sem hann svaraði aðsendum spurningum fylgjenda sinna, allt frá spurningum um ástarmál hans til spurninga um útlitið.

Sagði ósatt um glæp sinn

Í mars 2022 var Kleini handtekinn á Malaga á Spáni, fyrir alvarlega líkamsárás og þurfti hann að dvelja í héraðsfangelsinu í Malaga í átta mánuði. Mannlíf flutti fjöldi frétta af málinu á sínum tíma, sem og aðrir miðlar. Kleini lýsti því sem svo að hann hefði lent í „smá fyllerísslagsmál” eftir að hafa drukkið „einn eða tvo bjóra”. Þannig hafi hann ekki gert neitt.

Raunveruleikinn var hins vegar allt annar. Heimildin afhjúpaði að hann hefði í reynd verið handtekinn fyrir ofbeldisfullt rán og verið undir áhrifum fíkniefna. Í félagi við annan mann rændi hann 40 evrum af einum vegafaranda og hótaði svo öðrum með eggvopni. Í lýsingum dómsins kemur fram að þeir hafi kýlt mann við ránið og ráðist á fólk sem reyndi að bjarga honum frá þeim, þar á meðal vinkonu hans. Í dómnum kemur fram að Kleini og félagi hans hafi gengist við þessari atvikalýsingu.

Þetta var ekki það eina sem reyndist ótrúverðugt við frásagnir Kleina af ævintýrum hans í sólarlöndum.

Ótrúlegar frásagnir Malaga-fanga

Sölvi Tryggvason tók viðtal við Kleina þegar hann var laus. Frásagnir Kleina af fangelsisvistinni voru lyginni líkastar. Sagðist hann meðal annars hafa verið stunginn í kviðinn í fangelsinu, neyðst til að stinga mann, hafa lent í fangauppreisn og hafa orðið vitni að morði.

Kleini sagði frá hinni meintu hnífsstungu í viðtalinu við Sölva:

„Ég var stunginn í einu „rioti“. Það voru reyndar tvö „riot“ sem áttu sér stað en í því „rioti“ sem ég var stunginn þá var ég kominn í klíkuna með Pólverjunum. Þeir laumuðu síma yfir til Spánverjanna og þeir voru með hann í einn eða tvo daga. Þegar þeir skiluðu honum var kominn raki inn í skjáinn og þá byrjaði einhver tætingur þar á milli. Svo voru þetta orðin hópslagsmál. Ef ég hefði ekki staðið með Pólverjunum þá hefðu þeir hent mér úr klíkunni. Ég þurfti að taka þátt og svo allt í einu fann ég tvö högg og áttaði mig ekki alveg á því hvað þetta var. Svo sá ég blóð byrja að leka og þá áttaði ég mig á að ég hafði verið stunginn.“

Kleini sagðist ekki hafa fengið neina læknisaðstoð eftir stunguárásina, hann hafi bara þurft að fela sárin og harka af sér. Hinu meinta morði sem hann sagðist hafa orðið vitni að, lýsti hann á eftirfarandi máta:

„Svo var það morðið sem ég varð vitni að. Menn voru að rífast á klósetti þar sem engar myndavélar voru og tók einn upp heimatilbúinn hníf og stakk hinn rétt fyrir neðan naflann og risti hann allan upp.“ Sagði Kleini í viðtalinu að fangarnir hefðu allir hlaupið út af klósettinu en verið síðan yfirheyrðir.

„Enginn sagði orð af því að ef einhver hefði sagt frá þá hefði það sama verið gert við viðkomandi eins og gert var við þennan 19 ára strák. Maðurinn var drepinn þarna og það létu allir eins og ekkert hefði gerst.“

Mannlíf kannaði sannleiksgildi Kleina varðandi hið meinta morð í héraðsfangelsinu á Malaga en fann engar fréttir af því í spænskum fjölmiðlum. Síðasta andlátið með saknæmum hætti sem spænskir miðlar fjölluðu um, á þeim tíma sem Kleini sat inni, var skömmu fyrir jólin 2021, nánar tiltekið að morgni dags 22. desember er 51 árs gamall fangi fannst látinn í klefa sínum.

Í kjölfar handtöku og fangelsisvistunar Kleina, sleit Svala trúlofun þeirra en þegar fylgjandi hans á Instagram spurði hann út í það í nóvember 2022, hvort hann hyggðist ætla sér að „vinna Svölu aftur“, svaraði hann í Story, að hann vildi ekki svara neinum spurningum um Svölu. Um fullyrðingar margar um að hann hefði logið til um reynslu sína úr héraðsfangelsinu á Malaga, svaraði Kleini: „Mér er skítsama hvort fólk trúi þessu eða ekki. Ég veit hvað ég gekk í gegnum, ég veit hvað gerðist svo þið sem trúið þessu ekki – I don’t give a fuck.“

Um miðjan janúar 2023 hóf Kleini meðferð við áfengisfíkn í Krísuvík. Af því tækifæri skrifaði hann á Instagram: „Lífið hefur verið upp og niður eftir að ég kom út úr carsel [fangelsi] og í sannleika var það orðið of mikið fyrir mig og ég hef tekið þá ákvörðun að fara í langtíma meðferð á Krýsuvík í eins marga mánuði og mér finnst ég þurfa til þess að rétta úr kútnum, þetta er stórt skref fyrir mig og ég vona að Jesú sé að fylgja mér í rétta átt.“

Ný ást opinberuð

Stuttu eftir meðferðina, 23. apríl 2023, opinberuðu þau Kleini og fitness-drottningin Hafdís Björg Kristjánsdóttir samband sitt á Facebook, en fyrr í mánuðinum sagði Mannlíf frá því að þau væru að hittast.

„Við erum að taka eitt skref í einu og sjá hvert það leiðir okkur, við erum mjög ánægð með hlutina eins og þeir eru daginn í dag þó fjölmiðlar hafi farið aðeins á undan okkur með hvað opinberun varðar, en staðan er þannig að við erum ánægð með hvar við stöndum og stefnum,“ sagði Kleini í samtali við Mannlíf á þeim tíma.

Samband þeirra var ekki minna áberandi á slúðursíðum fréttamiðlanna en samband hans við Svölu áður. Athygli vakti aftur hversu mikill aldursmunur var á þeim, en ellefu ár skildu á milli þeirra. Þá átti hún fimm börn fyrir en Kleini, eins og áður kemur fram, eina dóttur. Meðal frétta sem bárust af sambandi þeirra var að þau hefðu fengið sér húðflúr af nöfnum hvors annars.

Síðar sama ár, 11. september, tilkynntu þau Kleini og Hafdís á Facebook að þau hefðu trúlofast. Á sama tíma tilkynnti Kleini að hann hyggðist taka sér pásu frá samfélagsmiðlunum, þar sem hann hefði svo margt á sinni könnu.

Tveimur mánuðum seinna, í desember 2023, snéri Kleini aftur á samfélagsmiðla og það með miklum látum. Þá birti hann myndskeið þar sem hann sést koma Hafdísi á óvart með jólagjöf af dýrari gerðinni, nefnilega forláta Porsche-bifreið.

„Ertu að gefa mér Porsche?“ spurði Hafdís forviða áður en hún hoppar í fang Kleina. „Ég er að gefa þér fokking Porsche!“ svaraði Kleini. Stuttu síðar var jólagjöfin komin á sölu. Í skriflegu svari til Vísis sagði hann um söluna: „Ég spurði Hafdísi hvað hún vildi í jólagjöf og sendi hún mér mynd af þessum bíl svo ég keypti hann og kom henni á óvart. Hún var í miklu sjokki og þorði ekki að segja mér að þetta væri ekkert bíllinn sem hana langaði í enda sendi hún þetta í einhverju djóki.“

Í maí 2024 fann Hafdís sig knúna til þess að svara fyrir orðróm sem var í dreifingu um að þau Kleini væru hætt saman. Mannlíf sagði frá því hún hefði sagt í Story á Instagram að þau væru alls ekki hætt saman, heldur þvert á móti. „Við erum ekki hætt saman enda styttist í brúðkaup hjá þessum lúðum,“ skrifaði hún og birti mynd af þeim saman.

Rétt fyrir jólin 2024 birti Smartland hins vegar frétt um sambandsslit þeirra en Kleini sagði þá í samtali við miðilinn að ekkert sérstakt hefði komið upp á. „Staðan er að við erum mjög góðir vinir, enda deildum við einstaklega fallegum tímum saman. En núna er komið að nýjum kafla í lífi okkar beggja.“

Þá höfðu óstaðfestar sögur gengið um að ekki væri allt sem sýndist.

Handtakan og opinberun Hafdísar

Um síðustu helgi handtók lögreglan á Akureyri þrjá karlmenn, grunaða um hrottalega hópnauðgun á ungri konu, en í gær fullyrti Morgunblaðið það sem áður hafði verið slúðrað um, að einn þeirra væri Kleini.

Í kjölfarið birti Hafdís Björg texta á samfélagsmiðlum þar sem hún segist vera með samviskubit yfir að hafa ekki sagt frá því ofbeldi sem hún varð fyrir í sambandi sínu með Kleina. „Mér þykir ótrúlega erfitt að fylgjast með fréttum í dag og erfitt að kenna ekki sjálfri mér um að hafa ekki stigið fram og varað aðrar stelpur við ofbeldinu sem fylgir þessum manni,“ skrifaði hún og bætti við „Samviskubitið er að drepa mig.“

Sagðist hún enn vera í áfallavinnu eftir sambandið og að hún hafi ekki tölu á því hversu oft Kleini hafi verið handtekinn og hótað henni lífláti.

„Ég leitaði oft eftir aðstoð. Ég hringdi margoft í lögregluna, en alltaf var honum sleppt daginn eftir og ég sat eftir með enn meiri ótta og afleiðingar.“

Svala Karítas birti einnig stuðningsyfirlýsingu í Story á Instagram. Þær höfðu orðið miklar vinkonur eftir að Hafdís og Kleini slitu sambandi sínu. „Stend með þér elsku gull og öllum þolendum ofbeldis,“ skrifaði Svala og bætti við: „Ég er sjálf þolandi ofbeldis af sama manni! Saman erum við survivors og hetjur og sterkar.“ Neðar á myndina skrifar Svala: „Líflínan mín í gegnum þennan viðbjóð. Sjúklega þakklát fyrir þig elsku gull“.

Rannsókn lögreglunnar á hópnauðguninni á Akureyri stendur nú yfir en mönnunum var öllum sleppt í gær.

Ekki hefur náðst í Kleina sjálfan, en fyrrverandi lögmaður hans vildi ekki staðfesta við Mannlíf hvort hann væri með mál hans á sínum höndum eða ekki.