Stjórnvöld í Austurríki tilkynntu í dag að þremur starfsmönnum rússneska sendiráðsins í Vín hefði verið vísað úr landi vegna gruns um njósnastarfsemi. Utanríkisráðherra landsins, Beate Meinl-Reisinger, sagði að stjórnvöld hygðust herða aðgerðir gegn njósnum og marka „nýja stefnu“ í öryggismálum.
Í yfirlýsingu frá austurríska utanríkisráðuneytinu, sem send var fréttastofunni AFP, var staðfest að starfsmennirnir hefðu verið gerðir brottrækir. Samkvæmt austurríska ríkisútvarpinu ORF hafði rússneski sendiherrann verið kallaður á fund ráðuneytisins í apríl vegna málsins.
ORF greindi jafnframt frá því að búnaður á þaki rússneska sendiráðsins í Vín hefði verið notaður til að hlera og safna gögnum, meðal annars frá alþjóðastofnunum með aðsetur í borginni sem nýta gervihnattanet til samskipta.
„Njósnir eru öryggisvandamál fyrir Austurríki. Núverandi ríkisstjórn hefur hafið stefnubreytingu og grípur markvisst til aðgerða gegn slíkri starfsemi,“ sagði Meinl-Reisinger í yfirlýsingu sinni.
Hún bætti við að austurrísk stjórnvöld hefðu komið afstöðu sinni skýrt á framfæri við rússnesk yfirvöld, meðal annars vegna umfangsmikils loftnetsbúnaðar við sendiráðið. „Það er óásættanlegt að diplómatísk friðhelgi sé nýtt til njósnastarfsemi,“ sagði ráðherrann.
Rússneska sendiráðið í Vín fordæmdi ákvörðunina og kallaði hana „tilefnislausa, pólitískt drifna og algjörlega óásættanlega“. Þá var varað við „hörðum viðbrögðum“ af hálfu Rússlands.
Austurríki hefur á undanförnum árum ítrekað verið tengt njósnamálum sem tengjast Rússlandi, sem hefur haft áhrif á orðspor landsins innan Evrópusambandsins. Núverandi samsteypustjórn íhaldsmanna, jafnaðarmanna og frjálslyndra hefur heitið því að herða löggjöf um njósnir og víkka út skilgreiningu slíkra brota.
Um 220 starfsmenn rússneska sendiráðsins eru skráðir í Austurríki, þar sem fjölmargar alþjóðastofnanir hafa aðsetur.
Frá innrás Rússlands í Úkraínu árið 2022 hefur Austurríki vísað um tug rússneskra sendiráðsstarfsmanna úr landi.
