Tuttugu og fimm ára gamall maður slasaðist alvarlega eftir að um tíu manna hópur réðst á hann af miklu offorsi í miðborg Las Palmas á Kanarí snemma á sunnudagsmorgun.
Lögreglan hefur þegar handtekið fjóra grunaða í tengslum við málið, þar af tvo ólögráða.
Árásin átti sér stað um klukkan fimm aðfaranótt sunnudags í nágrenni við Parque de Santa Catalina, svæði sem er mjög vinsælt á meðal heimamanna og ferðamanna, sérstaklega um helgar þegar næturlíf stendur sem hæst. Sjónarvottar kölluðu til lögreglu eftir að hafa orðið vitni að því þegar hópurinn kýldi og sparkaði ítrekað í fórnarlambið, meðal annars í höfuð þess þar sem maðurinn lá varnarlaus.
Lögreglan var fljót á vettvang og starfsfólk bráðatækna veitti manninum fyrstu hjálp á staðnum áður en hann var fluttur með sjúkrabíl á sjúkrahús. Læknar hafa staðfest að maðurinn hafi hlotið alvarlega höfuðáverka eftir mörg þung högg sem beindust að höfði hans.
Fjórir grunaðir í haldi lögreglu
Lögreglan var fljót að renna á slóðir hluta árásarmannanna með hjálp sjónarvotta og maka fórnarlambsins sem báru kennsl á árásarmennina. Fjórir einstaklingar voru handteknir í kjölfarið og reyndust tveir þeirra vera undir lögaldri. Við handtöku voru hinir grunuðu með greinileg mar og blóðbletti á fatnaði sínum. Lögreglan í Las Palmas lýsir því yfir að rannsókn málsins sé í algjörum forgangi og unnið sé hörðum höndum að því að hafa hendur í hári þeirra sex árásarmanna sem enn leika lausum hala.
