Lögreglan hafði í nógu að snúast í gær en alls 96 mál voru skráð.

Í gærkvöldi og nótt voru lögreglan og Skatturinn með aðgerðir á skemmtistöðum á höfuðborgarsvæðinu, nánar tiltekið í Hafnarfirði og Reykjavík. Aðgerðin beindist gegn öryggisþjónustufyrirtæki sem starfar á skemmtistöðum á þessum svæðum. Lögregla stöðvaði rekstur öryggisþjónustunnar enda hafði hún ekki starfsleyfi. Af þeim sökum þurftu tveir skemmtistaðir að stöðva rekstur sinn í kjölfarið þar sem ekki voru dyraverðir til staðar lengur og þeim tókst ekki að útvega nýja. Þriðja staðnum var lokað að beiðni Skattsins. Lögreglan mun vera með áframhaldandi eftirlit og aðgerðir á næstu dögum og vikum.

Í miðbænum veittist maður að dyravörðum en hann var í tökum þegar lögreglu bar að garði. Var hann fluttur á lögreglustöð og laus að skýrslutöku lokinni.

Tilkynnt var um átök á nokkrum stöðum í miðborginni þótt enginn hafi slasast alvarlega. Í öllum tilvikum þótti nóg að ræða við þá sem áttu hlut að máli.

Nokkrir voru teknir við akstur. Þá voru nokkrir undir áhrifum ávana- og/eða fíkniefna og einn sem hafði aldrei tekið bílpróf og einn aðili kærður fyrir akstur gegn rauðu umferðarljósi.