Minnst sjö létust og tæplega 60 særðust í árásum Rússa víða um Úkraínu á laugardag. Úkraínsk stjórnvöld segja Rússa hafa aukið umfang árása sinna að undanförnu, meðal annars á borgaralega innviði, þegar enn einn vetur stríðsins nálgast.
Tveir létust í Zaporizhzhia-héraði í suðurhluta landsins og tveir til viðbótar í Zhytomyr-héraði. Þar varð matvöruverslun í borginni Zvyagel, um 230 kílómetra vestur af Kyiv, fyrir árás að sögn Vitaliy Bunechko, héraðsstjóra.
Tvær bensínstöðvar í Korosten í sama héraði urðu einnig fyrir árásum en þar varð ekkert manntjón.
Tveir létust þegar eldflaug hæfði verksmiðju stálframleiðandans ArcelorMittal í Kryvyi Rig í miðhluta Úkraínu. Fyrirtækið greindi frá skemmdum á framleiðslumannvirkjum og lagði áherslu á að um borgaralega starfsemi í námu- og málmiðnaði væri að ræða. Fyrirtækið fordæmdi árásina harðlega.
Þá lést einn í Kramatorsk, skammt frá víglínunni í austurhluta landsins. Úkraínska innanríkisráðuneytið sagði rússneskan dróna hafa hæft fólksbifreið á bílastæði við stórmarkað.
Mikill fjöldi særðist einnig í árásunum. Volodymyr Zelensky, forseti Úkraínu, sagði 37 hafa særst þegar fjölbýlishús í Odesa varð fyrir árás. Björgunarsveitir leituðu jafnframt tveggja sem var saknað. Ellefu til viðbótar særðust í Chornomorsk í Odesa-héraði og fleiri í Kryvyi Rig og Kyiv-héraði.
Úkraínsk stjórnvöld segja Rússa einnig hafa aukið árásir á bensínstöðvar undanfarna daga, bæði í Kyiv og við helstu þjóðvegi. Sergiy Koretsky forsætisráðherra kallaði eftir auknum öryggisráðstöfunum vegna árásanna.
Zelensky hvatti bandamenn Úkraínu til að bregðast af meiri krafti við auknum árásum Rússa. Hann sagði viðbrögð öflugustu ríkja heims ekki vera í samræmi við þá stigmögnun sem ætti sér stað.
Á sama tíma hefur Úkraína aukið árásir sínar á skotmörk innan Rússlands. Zelensky sagði úkraínskar hersveitir hafa gert árásir á efnaverksmiðjur í Perm-héraði við Úralfjöll og Samara-héraði.
Árásirnar koma í kjölfar heimsókna bandarískra erindreka til bæði Moskvu og Kyiv í síðustu viku. Enginn marktækur árangur náðist í þeim viðræðum um möguleg lok stríðsins.
