Maður var í sumar úrskurðaður í gæsluvarðhald vegna gruns um tilraun til manndráps eða stórfellda líkamsárás á kærustu sína. Konan leitaði á bráðamóttöku Landspítala í Fossvogi með lífshættulega áverka.

Vísir greindi fyrst frá

Lögreglu var gert viðvart aðfaranótt 17. júlí og var maðurinn handtekinn á bráðamóttökunni. Konan sagði lögreglu upphaflega að hún hefði sjálf veitt sér áverkana með því að slá sig í höfuðið með mjólkurglasi. Læknisfræðileg gögn þóttu hins vegar ekki samræmast frásögninni.

Í annarri skýrslutöku breytti konan framburði sínum og sagði kærastann hafa ráðist á sig eftir rifrildi. Hann hefði verið með hamar og exi en hún vissi ekki hvort höggin hefðu verið veitt með höndum eða áhaldi.

Samkvæmt vottorði Landspítala hlaut konan meðal annars opið höfuðkúpubrot, kjálkabrot og brot á andlitsbeinum. Við húsleit lögreglu fundust blóðug exi, kúbein og kaðall með ætluðu blóði.

Maðurinn neitaði að mestu að tjá sig við rannsókn málsins.

Í greinargerð lögreglu segir að um „stórháskalega atlögu“ hafi verið að ræða og hending eina að ekki hafi farið verr. Maðurinn var úrskurðaður í gæsluvarðhald til 21. ágúst vegna alvarleika málsins og rannsóknarhagsmuna.