Móðir í Langholtshverfi kallar eftir aðgerðum Reykjavíkurborgar til að draga úr umferðarhraða á Langholtsvegi eftir að litlu munaði að ekið væri á hana og dóttur hennar við gangbraut í morgun.
Sigríður Erla Sturludóttir greinir frá atvikinu í Langholtshverfishópnum á Facebook. Segir hún ökumann hafa ekið augljóslega of hratt þegar mæðgurnar voru við gangbrautina hjá Langholtsvegi 112.
„Í morgun var næstum keyrt á okkur mæðgur við gangbrautina hjá Langholtsvegi 112 þar sem viðkomandi keyrði augljóslega alltof hratt,“ skrifar Sigríður.
Í kjölfarið tóku mæðgurnar sig til og útbjuggu skilti til að minna ökumenn á að hámarkshraði á götunni er 30 kílómetrar á klukkustund. Sigríður segir brýnt að borgaryfirvöld grípi til aðgerða, til dæmis með uppsetningu hraðahindrana, áður en alvarlegt slys verður.
Áhyggjur af umferðaröryggi á Langholtsvegi eru ekki úr lausu lofti gripnar. Karlmaður var sýknaður seint í fyrra í Héraðsdómi Reykjavíkur af ákæru fyrir líkamsmeiðingar af gáleysi vegna alvarlegs umferðarslyss á Langholtsvegi 26. nóvember 2024.
Maðurinn ók þá bifreið á gangandi vegfaranda og hund hans. Vegfarandinn slasaðist mjög alvarlega og hlaut meðal annars heilablæðingu, dreifðan heilaáverka, brot í hálshrygg og rifi, lungnamar og beinbrot í vinstri fótlegg. Ökumaðurinn var hins vegar sýknaður af ákærunni.
Umferðarhegðun í nágrenni Langholtsvegar hefur áður vakið athygli. Þegar malbiksframkvæmdir fóru fram í Skeiðarvogi árið 2019 og götunni var lokað milli Sæbrautar og Langholtsvegar brugðu nokkrir ökumenn á það ráð að aka upp á gangstéttir til að komast fram hjá lokuninni og fjallaði Mannlíf um málið á sínum tíma
Myndband af akstrinum vakti töluverða athygli á samfélagsmiðlum. Sá sem birti myndbandið sagði að litlu hefði munað að slys yrði skömmu áður en upptakan hófst. Lögreglan á höfuðborgarsvæðinu brást þá við myndbandinu og sagði: „Þetta er ótrúlegt að sjá.“
Sigríður hvetur ökumenn nú til að virða hámarkshraðann á Langholtsvegi á meðan beðið er eftir mögulegum aðgerðum borgarinnar.
„Munum þá eftir að hægja á okkur og keyra ekki hraðar en á 30 km hraða,“ skrifar hún.
