Eigendur húss í Hólahverfi í Reykjavík fengu ekki samþykki fyrir framkvæmdum sem þegar hafði verið ráðist í, en fimm nýjar íbúðir höfðu verið útbúnar í húsinu án tilskilinna leyfa.

Húsið var reist árið 1973 og má samkvæmt skipulagi vera að hámarki 287 fermetrar. Eftir að grafið hafði verið út úr sökkulrými í kjallara og þar útbúnar fjórar íbúðir, auk einnar í bílskúr, var húsið orðið 429,5 fermetrar.

Byggingarfulltrúi Reykjavíkur krafðist þess að húsinu yrði komið í fyrra horf innan 60 daga, ella yrðu lagðar á dagsektir. Eigendur kærðu ákvörðunina til úrskurðarnefndar um umhverfis- og auðlindamál.

Nefndin taldi 60 daga frestinn of skamman, meðal annars vegna umfangs framkvæmdanna og þess að íbúðirnar væru í útleigu samkvæmt samningum með lögbundnum uppsagnarfresti.

Tímamörkin voru því felld úr gildi. Nefndin benti jafnframt á að eigendurnir gætu sótt um byggingarleyfi vegna breytinganna á kjallaranum.