51 árs kona lést nokkrum dögum eftir að hafa gengist undir sex fegrunaraðgerðir í einu á sjúkrahúsi í Goiânia í Brasilíu. Aðgerðirnar tóku samtals um átta klukkustundir.
Konan hét Andreia Vieira Gaspar og hafði búið á Spáni fyrir aðgerðina. Samkvæmt brasilíska miðlinum G1 hafði hún safnað um 118 þúsund brasilískum real, jafnvirði tæplega 2.8 milljón króna, á tveimur árum til að greiða fyrir aðgerðirnar.
Meðal aðgerðanna sem Andreia gekkst undir voru andlitslyfting, augnlokaaðgerð, fitusog og fitufylling í andlit. Aðgerðirnar fóru fram 12. ágúst síðastliðinn.
Systir hennar, Djiane Vieira, hefur nú kallað eftir svörum vegna andlátsins. Hún heldur því fram að Andreia hafi ekki farið í sérstakt læknisviðtal fyrir aðgerðina í Brasilíu og að rannsóknir fyrir aðgerðina hafi verið framkvæmdar á Spáni.
Að sögn Djiane versnaði ástand systur hennar verulega þegar tunga hennar tók að bólgna. Hún segist ítrekað hafa reynt að ná sambandi við læknateymið og kallað eftir aðstoð en að viðbrögð hafi ekki verið fullnægjandi. Andreia lést að sögn í örmum systur sinnar eftir ítrekaðar endurlífgunartilraunir.
Djiane hefur jafnframt haldið því fram að Ankar-sjúkrahúsið, þar sem aðgerðirnar fóru fram, hafi hvorki verið með gjörgæsludeild né sjúkrabíl til taks.
Læknirinn Lessandro Martins hefur ekki viljað tjá sig um klínískar upplýsingar málsins og vísar til trúnaðar við sjúklinga. Í yfirlýsingu sagðist hann treysta því að rannsókn málsins myndi leiða í ljós að rétt hefði verið staðið að meðferðinni.
Lögmaður Ankar-sjúkrahússins hafnar því að Andreia hafi ekki fengið viðeigandi aðstoð og segir henni hafa verið veitta tafarlausa bráðaþjónustu og gripið hafi verið til nauðsynlegra ráðstafana.
Málið er nú til rannsóknar.
