Sextán aldraðir létust í miklum eldsvoða á hjúkrunarheimili í Chile aðfaranótt laugardags. Heimilið hafði áður sætt afskiptum yfirvalda vegna brota á reglum og hafði ítrekað verið sektað.
Eldurinn kom upp á föstudagskvöld á einnar hæðar hjúkrunarheimili í Araucanía-héraði, um 640 kílómetra suður af höfuðborginni Santiago. Slökkviliði tókst að ráða niðurlögum eldsins snemma á laugardagsmorgun.
Alls voru 26 heimilismenn í húsinu þegar eldurinn kom upp. Sextán þeirra létust en tíu komust lífs af og voru fluttir á sjúkrahús til aðhlynningar.
Yfirvöld í sveitarfélaginu Pitrufquén lýstu yfir mikilli sorg vegna harmleiksins. Jacqueline Romero, bæjarstjóri sveitarfélagsins, sagði atburðinn hafa valdið miklum sársauka í samfélaginu og að starfsfólk heilbrigðis- og almannavarnayfirvalda hefði veitt aðstandendum stuðning.
Myndir sem birtar voru á samfélagsmiðlum sýndu gríðarlega eldtungu rísa upp frá byggingunni í myrkrinu á meðan slökkviliðsmenn börðust við eldinn. Á laugardag unnu slökkviliðsmenn áfram að því að hreinsa brak af vettvangi, þar á meðal hluta af þaki hússins sem hafði hrunið. Lögregla lokaði svæðinu af meðan rannsókn fór fram.
Ekki liggur fyrir hvað olli eldsvoðanum. Jorge Granada, saksóknari sem fer með rannsókn málsins, sagði að vettvangsrannsókn og aðrar rannsóknaraðgerðir væru hafnar. Markmiðið væri að komast að upptökum og orsök eldsins og jafnframt kanna hvort einhver utanaðkomandi hefði komið að málinu. Eigendur hjúkrunarheimilisins hafa verið boðaðir í skýrslutöku.
Fram hefur komið að rekstur heimilisins hafi áður verið til skoðunar hjá yfirvöldum. José Bravo, embættismaður hjá heilbrigðisyfirvöldum héraðsins, sagði starfsemina ekki hafa uppfyllt tilskildar reglur. Málsmeðferð og sektir vegna starfseminnar hefðu átt sér stað allt frá árinu 2019 og um ítrekuð brot hefði verið að ræða.
Romero sagði jafnframt að sveitarfélagið hefði sent erindi í febrúar þar sem sérstaklega var óskað eftir eftirliti með heimilinu vegna þess að reksturinn uppfyllti ekki gildandi reglur.
José Antonio Kast, forseti Chile, hefur krafist þess að málið verði upplýst að fullu og nauðsynlegar úrbætur gerðar til að koma í veg fyrir að sambærilegur harmleikur endurtaki sig. Hann hefur jafnframt fyrirskipað brýna úttekt á aðstæðum á hjúkrunarheimilum víða um land.
