Kolbrún Bergþórsdóttir segir Þorgerði Katrínu Gunnarsdóttur utanríkisráðherra hafa orðið skotspón harðrar andúðar vegna eindregins stuðnings hennar við Evrópusamstarf. Í pistli á DV segir Kolbrún ráðherrann meðal annars hafa fengið alvarlegar hótanir sem lögregla hafi rannsakað og reglulega sæta svívirðingum.

Kolbrún beinir sjónum sérstaklega að undirskriftalista þar sem þess er krafist að Þorgerður Katrín segi af sér ráðherradómi og leiði Viðreisn úr ríkisstjórn. Sigfús Aðalsteinsson, forsvarsmaður Íslands – þvert á flokka, stendur að listanum.

Kolbrún sparar ekki stóru orðin og segir framtakið „nánast ofstækisfulla gjörð“. Hún bendir á að þjóðin hafi hafnað viðræðum við Evrópusambandið 29. ágúst og ríkisstjórnin virt þá niðurstöðu. Þorgerður Katrín hafi því ekki reynt að ganga gegn vilja kjósenda.

Kolbrún segir jafnframt hluta andúðarinnar í garð Þorgerðar Katrínar, Kristrúnar Frostadóttur forsætisráðherra og Ingu Sæland eiga rætur að rekja til vanþóknunar á því að konur leiði ríkisstjórnina.

Hún segir ákveðinn hóp karla tala niðrandi um „kerlingarnar“, „dömurnar“ og „fraukurnar“ í ríkisstjórninni og telur slíkt bera vott um minnimáttarkennd.

Þrátt fyrir árásirnar segir Kolbrún konurnar þrjár ekki láta kveða sig í kútinn. Ríkisstjórnin sé, ólíkt þeirri síðustu, „sprelllifandi“.