Tveir karlmenn voru handjárnaðir við sæti sín um borð í farþegaflugvél eftir að þeir eru sagðir hafa haft í frammi ofbeldisfullar hótanir og meðal annars haldið því fram að þeir væru með skotvopn.

Atvikið átti sér stað á föstudag um borð í flugi Qatar Airways frá Melbourne í Ástralíu til Doha í Katar.

Samkvæmt frásögnum vitna virtust mennirnir órólegir skömmu eftir brottför. Þeir hafi ítrekað staðið upp úr sætum sínum, gengið um farþegarýmið og rótað í farangri sínum.

Ástandið er sagt hafa stigmagnast þegar um sex klukkustundir voru eftir af fluginu. Mennirnir eru þá sagðir hafa lent í átökum og hótað bæði farþegum og áhöfn vélarinnar.

Myndskeið sem birt hafa verið á samfélagsmiðlum sýna flugliða reyna að yfirbuga mennina. Einn farþegi sagði þá meðal annars hafa hrækt á flugliða og skallað þá. Að sögn vitna þurfti allt að sex manns til að ná stjórn á hvorum mannanna.

Qatar Airways hefur staðfest að tveir karlkyns farþegar hafi lent í líkamlegum átökum um borð. Þeir voru yfirbugaðir og handjárnaðir við sæti sín það sem eftir lifði flugsins.

Lögregla beið mannanna þegar vélin lenti í Doha og voru þeir handteknir við komuna.