Karlmaður á fertugsaldri hefur verið dæmdur í fimm mánaða skilorðsbundið fangelsi fyrir alvarlegt ofbeldi gegn sambýliskonu sinni á heimili þeirra í Reykjavík. Konan hlaut meðal annars tvíbrotinn kjálka í árásinni.
Dómurinn var kveðinn upp í Héraðsdómi Reykjavíkur. Maðurinn var ákærður fyrir brot í nánu sambandi vegna atviks sem átti sér stað 10. apríl 2025.
Samkvæmt ákæru sló maðurinn sambýliskonu sína með krepptum hnefa í andlitið. Afleiðingarnar voru þær að hún hlaut tvíbrotinn kjálka vinstra megin auk mars í andliti, munni og munnholi. Var háttsemin talin fela í sér alvarlega ógn við líf, heilsu og velferð konunnar.
Maðurinn játaði brotið skýlaust fyrir dómi. Hann átti ekki sakaferil að baki hér á landi.
Við ákvörðun refsingar var játning mannsins metin honum til málsbóta. Þá lýsti hann eftirsjá og sagðist hafa hætt áfengisdrykkju eftir brotið. Hann hefði þó neytt áfengis í sumarleyfi í heimalandi sínu og því leitað eftir áfengismeðferð sem á að hefjast síðar í september. Fyrir dómi kvaðst hann vilja verða betri maður.
Til þyngingar var litið til alvarleika árásarinnar og þess að brotið átti sér stað í nánu sambandi þar sem maðurinn braut gegn trausti og trúnaði brotaþola.
Maðurinn var dæmdur í fimm mánaða fangelsi en fullnustu refsingarinnar frestað í tvö ár haldi hann almennt skilorð. Þá var honum gert að greiða 56.510 krónur í sakarkostnað.
