Verð á aðgangi að íslenskum baðlónum gæti hækkað um rúmar 500 krónur og allt að tæplega 1.800 krónum verði virðisaukaskattur hækkaður í 24 prósent og rekstraraðilar velti hækkuninni að fullu út í verð til neytenda.
Þetta kemur fram í greiningu hjá Heimildinni í nýjasta tölublaði þeirra.
Talsverður verðmunur er nú á aðgangi að vinsælum baðstöðum landsins. Gamla laugin á Flúðum, Secret Lagoon, er ódýrust þeirra sem bornir voru saman. Þar kostar almennur aðgangur fyrir fullorðna 4.500 krónur. Miðað við 24 prósenta virðisaukaskatt og óbreyttar tekjur rekstraraðila án skatts gæti verðið hækkað í 5.027 krónur, eða um 527 krónur.
Hálendisböðin í Kerlingarfjöllum kosta nú 5.500 krónur en verðið gæti farið í 6.144 krónur. Hjá Hvammsvík, þar sem verð er á bilinu 5.900 til 9.900 krónur, gæti aðgangurinn kostað 6.591 til 11.059 krónur. Hjá Laugarás Lagoon gæti verð á sama hátt hækkað úr 6.900–9.900 krónum í 7.708–11.059 krónur.
Algengt verð fyrir aðgang að baðlónum er nú um 7.500 til 8.000 krónur. Laugarvatn Fontana, Skógarböðin og Sjóböðin á Húsavík rukka 7.490 krónur fyrir grunnmiða fullorðinna. Verðið gæti hækkað í 8.367 krónur. Aðgangur að Vök gæti farið úr 7.690 í 8.591 krónu og hjá Krauma úr 7.900 í 8.825 krónur.
Jarðböðin við Mývatn, Earth Lagoon Mývatn, rukka nú 7.900 til 11.900 krónur og gæti verðið farið í 8.825 til 13.294 krónur. Ódýrasti aðgangur að Reykjaböðum gæti sömuleiðis hækkað úr 7.900 í 8.825 krónur.
Mesta hækkunin í krónum talið yrði hjá dýrustu baðlónunum. Ódýrasti aðgangur að Bláa Lóninu gæti hækkað úr 11.990 í 13.394 krónur. Hjá Sky Lagoon gæti ódýrasti miðinn farið úr 14.990 í 16.746 krónur, sem er 1.756 króna hækkun.
Misjafnt er þó hvað innifalið er í aðgangseyri og því er verðsamanburðurinn ekki að öllu leyti sambærilegur.
