Þórdís Kristmundsdóttir, fyrrverandi prófessor í lyfjafræði við Háskóla Íslands, lést fimmtudaginn 11. júní.

Greint er frá andláti hennar í Morgunblaðinu.

Þórdís fæddist 13. nóvember 1948 og lauk stúdentsprófi frá Menntaskólanum í Reykjavík árið 1968. Hún lauk síðar meistaraprófi og doktorsprófi í lyfjafræði frá Háskólanum í Manchester og hóf störf við Háskóla Íslands árið 1979. Árið 1986 var hún skipuð prófessor í lyfjagerðarfræði og varð önnur konan sem hlaut prófessorsstöðu við skólann.

Rannsóknir hennar beindust meðal annars að þróun lyfjaforma sem byggðu á sýkladrepandi fitusýrum og mónóglýseríðum til að fyrirbyggja sýkingar og meðhöndla húð- og slímhimnusjúkdóma. Hún birti fjölmargar vísindagreinar og hélt fyrirlestra um rannsóknir sínar.

Þórdís gegndi jafnframt fjölmörgum trúnaðar- og félagsstörfum, meðal annars fyrir Lyfjafræðingafélag Íslands, Háskóla Íslands og Krabbameinsfélag Íslands. Árið 2018 hlaut hún gullmerki Lyfjafræðingafélags Íslands fyrir framlag sitt til fagstéttarinnar.

Þórdís lætur eftir sig eiginmann, tvær dætur og sex barnabörn.