Framkvæmdastjóri NATO, Mark Rutte, fékk beinskeyttar spurningar frá dönskum blaðamanni á leiðtogafundi bandalagsins í Ankara í Tyrklandi eftir að hafa setið þegjandi við hlið Donalds Trump Bandaríkjaforseta þegar hann ítrekaði kröfu sína um að Bandaríkin eignuðust Grænland.

Trump gagnrýndi NATO á fundinum og sagði óánægju sína beinast að afstöðu bandalagsins til Grænlands.

„Ég er ekki ánægður með NATO vegna þess sem þau gerðu í Grænlandi,“ sagði Trump, á meðan Rutte sat hjá, þagði og virtist brosa.

Danskur blaðamaður gerði þetta að umtalsefni á blaðamannafundi og spurði Rutte hvort honum fyndist ekki erfitt að sitja þegjandi undir ummælum Trump.

„Trump talar um að leggja Grænland undir sig, ræðst á bandamenn eins og Spán og kyndir undir viðskiptastríðum,“ sagði blaðamaðurinn áður en hann spurði:

„Hefur þetta einhver áhrif á sjálfsvirðingu þína þegar þú situr svona og segir ekki neitt?“

Rutte hafnaði gagnrýninni og varði samstarf sitt við Trump. Hann hrósaði Bandaríkjaforsetanum fyrir að hafa styrkt NATO og sagði að leiðtoginn hefði átt þátt í að efla bandalagið.

Hann vék einnig að ummælum Trumps um Grænland og sagðist deila áhyggjum hans af mikilvægi eyjunnar fyrir öryggi á norðurslóðum og nauðsyn þess að halda aftur af áhrifum Rússlands og Kína þar. Hann ítrekaði þó að NATO-ríkin yrðu að vinna saman að slíkum öryggismálum.