Sænska lýðheilsustofnunin hefur hvatt foreldra til að leggja símana frá sér þegar þau verja tíma með börnum sínum. Nýjar ráðleggingar stofnunarinnar voru kynntar á mánudag og byggja á rannsóknum um áhrif skjánotkunar á samskipti foreldra og barna.
Fram kemur að stofnunin hafi frá árinu 2024 hvatt foreldra til að velta fyrir sér eigin snjallsímanotkun í návist barna, en nú séu lagðar fram skýrari og ítarlegri leiðbeiningar.
„Leggðu símann frá þér þegar þú ert með barninu þínu. Notaðu hann aðeins ef nauðsyn krefur eða þegar þið notið hann saman,“ segir í tilkynningu frá stofnuninni en talið er sænskir foreldrar hafi ekki staðið sig nógu vel í þessum málefnum.
Jafnframt eru foreldrar hvattir til að tileinka sér heilbrigðar skjávenjur sjálfir þar sem hegðun fullorðinna hafi áhrif á börn. Samkvæmt stofnuninni sýna rannsóknir að mikil skjánotkun foreldra geti haft neikvæð áhrif á samskipti við börn og aukið líkur á því að börn þrói með sér sambærilegar venjur.
Einnig er mælt með svokölluðum „skjálausum svæðum“ á heimilum, meðal annars við matarborðið og í svefnherbergjum.
Helena Frielingsdorf, geðlæknir hjá stofnuninni, segir að börn verði ekki aðeins fyrir áhrifum af því sem fullorðnir segi heldur einnig af hegðun þeirra.
„Smávægilegar breytingar í daglegu lífi geta haft áhrif bæði á samskipti í núinu og venjur barnsins til framtíðar,“ segir hún.
Svíþjóð hefur á undanförnum árum gripið til ýmissa aðgerða til að draga úr skjánotkun barna. Í janúar tilkynnti ríkisstjórnin að snjallsímar yrðu bannaðir í skólum fyrir nemendur upp í níunda bekk, eða fyrir börn allt að 15 til 16 ára aldri.
