Söngkonan sívinsæla, Salka Sól Eyfeld rifjar upp í Story á Instagram skondið atriði úr jólatónleikum Emmsjé Gauta, Julevenner fyrir nokkrum árum.

Tilefni færslu Sölku Sólar var upprifun rapparans Emmsjé Gauta, þar sem hann birtir ljósmynd á Facebook af handskrifuðu bréfi sem innihélt hugmynd að atriði á Julevenner tónleikunum. Við myndina skrifar Gauti: „Elska að þetta atriði hafi farið í gegn.“

Salka Sól var ófrísk af fyrsta barni sínu þegar hún kom fram á jólatónleikunum og því fannst Gauta tilvalið að nýta það í smá sprell.

En hvert var atriðið? Á miðanum stóð:

„Salka í Dansaðu vindur. Atriði, hættir í miðju atriði því hún fær hríðir. Er læknir í húsinu?? „Sagði einhver Doktor? Doctor Love?“ Páll Óskar birtist á tekur syrpu. Gleðileg jól.“

Salka Sól segir frá því í sinni færslu að hún hafi verið ólétt í fyrsta sinn þegar hún steig á svið á tónleikunum en hafði gleymt að láta mömmu sína vita af atriðinu. „Hún greyið fríkaði út og ég er ekki viss um að hún geti hlegið að þessu í dag.“