Glæsilegt og mikið endurnýjað einbýlishús við Hraunbraut 26 á Kársnesi í Kópavogi er komið á sölu fyrir 220 milljónir króna. Um er að ræða vandaða eign með bílskúr, stórum útsýnissvölum og rúmgóðri lóð á einum eftirsóttasta stað bæjarins.

Húsið var byggt árið 1965 og er teiknað af arkitektinum Kjartani Sveinssyni. Samkvæmt fasteignaskrá er eignin skráð 191,4 fermetrar, en að auki hefur verið útbúin um 30 fermetra íbúð á neðri hæð með sérinngangi, eldhúsaðstöðu og baðherbergi. Það rými er þó óskráð og ósamþykkt. Nýtanlegt rými hússins er því um 221 fermetri alls.

Fram kemur í lýsingu að húsið hafi verið endurnýjað með miklum metnaði og sameini nútímaleg þægindi og yfirvegaða hönnun í rótgrónu íbúðahverfi á Kársnesinu. Aðalrými hússins eru sögð björt og opin með stórum gluggum til norðurs og vesturs þar sem útsýnið fær að njóta sín.

Eldhús, stofa og borðstofa mynda opið alrými sem hentar bæði fyrir fjölskyldulíf og móttöku gesta. Þá eru stórar svalir við húsið sem bjóða upp á víðsýni yfir nærumhverfið.

Lóðin er alls 712 fermetrar að stærð og býður upp á fjölbreytta nýtingarmöguleika. Eignin stendur í grónu og vinsælu hverfi þar sem stutt er í þjónustu, skóla og útivistarsvæði.