Við Strandgötu 23 á Akureyri er nú til sölu skemmtileg og mikið endurnýjuð 32,9 fermetra íbúð sem hentar vel fyrir einstakling eða par.

Um er að ræða 1–2 herbergja íbúð í grennd við miðbæinn og er ásett verð 29,9 milljónir króna. Húsið var byggt árið 1906. Eins og sjá má á myndum þá er húsið mjög einstakt að undanverðu.

Íbúðin skiptist í forstofu, baðherbergi, svefnherbergi og opið alrými með eldhúsi og stofu. Forstofan er með flísum á gólfi og hvítum sprautulökkuðum fataskáp. Baðherbergið er flísalagt með dökkum flísum á gólfi og ljósum á veggjum. Þar er ljós innrétting, sturta, handklæðaofn, vegghengt salerni og aðstaða fyrir þvottavél og þurrkara.

Svefnherbergið er með harðparketi og fataskáp en í alrýminu sameinast stofa og eldhús í björtu og snyrtilegu rými. Eldhúsið er með ljósri innréttingu, efri og neðri skápum, dökkri borðplötu og flísum milli skápa. Þá fylgja helluborð og ofn ásamt stæði fyrir ísskáp.

Eignin var mikið endurnýjuð í kringum árið 2020. Þá voru meðal annars gólfefni og innréttingar endurnýjuð auk þess sem bakhús var klætt bárujárni að utan og skipt um gler og glugga. Gólfhiti er í íbúðinni sem eykur þægindi til muna.

Íbúðin er staðsett á vinsælum stað á Akureyri með stutta leið í miðbæinn, þjónustu og útivist.