Einn fremsti hafvísindamaður Kanaríeyja varar við því að versnandi sjógæði við strendur eyjanna séu orðin vaxandi ógn, ekki aðeins fyrir lífríki hafsins heldur einnig heilsu íbúa og ferðamanna. Hann hvetur stjórnvöld til tafarlausra aðgerða.
Ricardo Haroun, forstöðumaður ECOAQUA-rannsóknastofnunarinnar við háskólann á Gran Canaria, segir að óhreinsað skólp sem berst í sjóinn og aukið magn saltpækils frá sjóafsöltunarstöðvum hafi „alvarlegar afleiðingar“ fyrir vistkerfi hafsins.
Að sögn Harouns hefur versnandi vatnsgæði við strendur ekki aðeins áhrif á líffræðilega fjölbreytni og þau gæði sem hafsvæðin veita, heldur geti þau einnig haft áhrif á heilsu þeirra sem baða sig í sjónum, bæði heimamanna og þeirra milljóna ferðamanna sem heimsækja strendur eyjanna ár hvert.
Hann segir brýnt að stjórnvöld á Kanaríeyjum geri meðhöndlun skólps og saltpækils að forgangsmáli og móti markvissari langtímastefnu í umhverfismálum.
Viðvörunin kemur í kjölfar vaxandi áhyggja af sjógæðum við Kanaríeyjar. Undanfarið hefur þurft að loka nokkrum baðströndum vegna bakteríumengunar og aukin athygli hefur beinst að meðhöndlun fráveitu á eyjunum.
Vara við áhrifum afsöltunar
Haroun lét þessi orð falla á fyrsta svæðisfundi vísindaráða lífhvolfssvæða Kanaríeyja sem haldinn var í Puerto del Rosario á Fuerteventura.
Hann segir nú þegar til staðar nýja tækni sem geti dregið verulega úr, eða jafnvel komið í veg fyrir losun mengandi efna í sjó. Slíkar lausnir gætu jafnframt skapað ný störf innan svokallaðs „blás hagkerfis“, sem byggir á sjálfbærri nýtingu hafsins.
Haroun bendir einnig á að bæði evrópskir styrkir og einkafjárfestingar séu í boði til að endurnýja fráveitukerfi og afsöltunarstöðvar.
Sjávargróður hverfur
Á fundinum bentu vísindamenn á að hnignun líffræðilegrar fjölbreytni í hafinu væri eitt stærsta umhverfisvandamál Kanaríeyja. Þar væri ófullnægjandi meðhöndlun skólps og aukin losun saltpækils meðal helstu orsaka.
Þótt hluti frárennslisins sé löglegur segir Haroun að annað sé ólöglegt og að hvort tveggja geti valdið umhverfisspjöllum ef ekki sé rétt staðið að málum.
Sérstaklega hafi sjávargrasbreiður, svokallaðir sebadales, orðið illa úti. Haroun segir stór hluti þessara vistkerfa hafa horfið á síðustu áratugum vegna skólpmengunar og síðar vegna aukinnar losunar saltpækils.
Þessar sjávargrasbreiður gegna mikilvægu hlutverki sem uppeldis- og hrygningarsvæði fjölmargra sjávartegunda, þar á meðal nytjafiska sem eru undirstaða hefðbundinna fiskveiða á Kanaríeyjum.
