Sprengjuhótun um borð í farþegaþotu á flugvellinum Tenerife South reyndist á endanum fölsk, en hún olli því að flugi til Frankfurt seinkaði um tæpar þrjár klukkustundir á laugardag en spænskir fjölmiðlar greina frá þessu.

Atvikið átti sér stað skömmu áður en flugvél átti að hefja flugtak klukkan 16:55 að staðartíma. Samkvæmt upplýsingum hafði farþegaþotan þegar yfirgefið flughliðið og var á leið að flugbraut þegar flugumferðarstjórn barst tilkynning um meinta sprengju um borð.

Í kjölfarið var flugmönnum skipað að hætta við flugtakið og snúa vélinni aftur að flugstöðinni. Þar voru allir farþegar látnir yfirgefa vélina með handfarangur sinn á meðan öryggissveitir hófu ítarlega leit samkvæmt viðbragðsáætlun spænskra flugmálayfirvalda.

Sem hluti af öryggisferlinu var allur innritaður farangur tekinn úr lest vélarinnar og skimaður með sérhæfðum búnaði auk þess sem leitarhundar voru notaðir til að kanna hvort sprengiefni kynni að leynast í farangrinum.

Eftir að ítarleg leit hafði farið fram staðfestu yfirvöld að engin sprengja væri um borð og að hótunin hefði verið fölsk.

Farþegum var í kjölfarið heimilað að fara aftur um borð og lagði vélin loks af stað til Frankfurt um klukkan 19:30, nær þremur klukkustundum síðar en áætlað hafði verið.

Enginn slasaðist í tengslum við atvikið og starfsemi flugvallarins hélt áfram að loknum öryggisaðgerðum.