Þrír einstaklingar slösuðust í atviki sem átti sér stað í skóla í Manchester á Englandi í dag. Lögregla handtók skólastúlku í kjölfar málsins.
Lögreglan í Greater Manchester greindi frá því að viðbragðsaðilar hefðu verið sendir að skólanum, Co-op Academy, í norðurhluta borgarinnar eftir tilkynningu um alvarlegt atvik. Samkvæmt upplýsingum frá lögreglu hlutu þrír einstaklingar áverka, en talið er að meiðsl þeirra séu ekki alvarleg.
Breskir fjölmiðlar greina frá því að um stungusár sé að ræða, þó lögreglan hafi ekki staðfest opinberlega að hnífi hafi verið beitt í árásinni.
Skólanum var lokað tímabundið á meðan lögregla og neyðarþjónusta sinntu vettvangi. Fjöldi lögreglubifreiða og þyrla var sendur á staðinn samkvæmt fréttum Manchester Evening News.
Í tilkynningu frá lögreglu segir að neyðarþjónusta sé enn að störfum á vettvangi og að unnið sé náið með stjórnendum skólans vegna málsins. Þá er tekið fram að ekkert bendi til þess að frekari hætta steðji að nemendum eða starfsfólki skólans.
Atvikið kemur á sama tíma og bresk stjórnvöld hafa hert aðgerðir gegn hnífaburði meðal ungmenna og sölu á bönnuðum hnífum og sveðjum, meðal annars í gegnum netverslanir.
Í febrúar á þessu ári var 13 ára drengur handtekinn og ákærður vegna gruns um að hafa stungið tvo drengi í skóla í London. Málið vakti mikla athygli og ýtti undir kröfur um hertar aðgerðir gegn ofbeldi meðal ungmenna.
