Sænskur dómstóll dæmdi í dag 61 árs gamlan mann í fjögurra ára og fimm mánaða fangelsi fyrir að hafa skipulagt vændi eiginkonu sinnar og hagnast á því um árabil. Málið hefur vakið mikla athygli í Svíþjóð og verið líkt við hið umtalaða mál í Frakklandi þar sem eiginmaður Gisèle Pelicot var sakfelldur fyrir að hafa misnotað eiginkonu sína með grófum hætti.
Maðurinn var einnig sakfelldur fyrir tilraun til nauðgunar, líkamsárásir, hótanir og minniháttar fíkniefnabrot. Samkvæmt dómi stóð brotastarfsemin yfir í um þrjú ár.
Í niðurstöðu dómsins kemur fram að maðurinn hafi átt frumkvæði að því að eiginkona hans færi að selja vændi og hafi jafnframt séð um mestalla skipulagningu starfseminnar. Dómurinn taldi að konan hefði verið „miskunnarlaust misnotuð“ og því væri um stórfellt brot að ræða.
Saksóknari málsins hefur áður greint frá því að um 120 kaupendur vændis hafi verið auðkenndir við rannsóknina. Konan hafi búið við mikinn ótta gagnvart eiginmanni sínum og meðal annars verið hótað af honum ef hún sýndi mótþróa.
Dómstóllinn sýknaði manninn hins vegar af átta ákæruliðum. Taldi rétturinn að í sjö tilvikum væri ekki unnt að skera úr um hvort þátttaka konunnar hefði verið sjálfviljug eða ekki, en í einu tilviki þótti ekki nægilega skýrt hvaða kynferðislegu athafnir hefðu átt sér stað.
Af 29 einstaklingum sem ákærðir voru fyrir kaup á vændi voru 28 sakfelldir. Tveir hlutu fangelsisdóma en aðrir voru dæmdir til sektargreiðslu eða skilorðsbundinna refsinga.
