Óútskýrð slys og „draugahemlanir“ setja spurningamerki við hversu öruggt er að reiða sig á sjálfsstýringarbúnað og sjálfvirku stýringaraðstoðina í Teslum. Bílar Teslu lenda í flestum árekstrum af öllum öðrum bílategundum í Bandaríkjunum samkvæmt skýrslu sem Forbes greindi frá fyrr á árinu. Af hverjum 1.000 ökumönnum lentu 26,67 ökumenn Teslu-bíla í árekstri árið 2024 samkvæmt skýrslunni. Næstu bílaframleiðendur á eftir Teslu voru Ram með 23,15 ökumenn sem lentu í árekstrum og Subaru með 22,89 af hverjum 1.000.
Skýrslan segir ökumennina sjálfa ástæðuna fyrir þessari háu slysatíðni. Hins vegar virðast tölur frá samgöngustofum bandaríska ríkisins (NHTSA og NTSA) sýna aðra mynd. Frá því að Tesla byrjaði að bjóða upp á sjálfsstýringarbúnað og sjálfvirka stýringaraðstoð í bílunum sínum hafa orðið hundruðir slysa og 51 dauðsfall í tengslum við notkun búnaðarins í Bandaríkjunum.
Margir viðskiptavinir Teslu hafa kvartað undan galla í sjálfvirku stýringaraðstoðinni hjá bílum þeirra. Stjórnendur Teslu höfðu reynt að halda því leyndu en uppljóstrari lak yfirgripsmiklum gögnunum í fjölmiðla árið 2023. Rannsóknarblaðamenn hjá The Guardian hafa verið að greiða úr gögnunum síðan.
The Guardian hefur meðal annars lýst því að 2.400 viðskiptavinir Teslu sendu inn kvartanir vegna óviljandi hröðun bíls við notkun stýringaraðstoðarinnar og yfir 1.500 kvartanir bárust vegna hemlunargalla í búnaðinum. Tæp 400 tilfelli af hemlunargöllunum eru „draugahemlanir“ þar sem bílarnir hemla vegna falskra viðvarana um árekstra. Þessi draugahemlun getur stefnt lífum í hættu ef bíll tekur á því að snarhamla skyndilega á hraðbraut.
Í „Teslu-skjölunum“ eru skráð rúmlega 1.000 árekstrar í tengslum við sjálfstýringarbúnaðinn eða sjálfvirku stýringaraðstoðina. Þar af eru nokkur banaslys þar sem ökumenn voru að nota sjálfstýringarbúnaðinn þegar slysin áttu sér stað og enn er óútskýrt hvað hafi farið úrskeiðis.
Fleiri gallar finnast í búnaði Telsu bílanna sem The Guardian rekur til drauma Elon Musks um að framleiða framúrstefnulega bíla sem kemur oft á kostnað öryggis. Þar á meðal eru nokkur dæmi um dauðsföll ökumanna Teslu-bíla vegna þess að innfelldu handföng bílanna opnuðust ekki eins og á að gerast eftir árekstra. Ekki var hægt að bjarga ökumönnunum úr bílunum vegna gallans sem hefur leitt til nokkurra dauðsfalla.
EuroNCAP árekstursprófar alla nýja bíla á markaði í Evrópu og metur öryggi þeirra. Þar eru allir bílar Teslu með fimm stjörnur af fimm mögulegum í öryggiseinkunn. Þrátt fyrir það voru allir bílar Teslu með sjálfstýringarbúnað innkallaðir í desember árið 2023 fyrir galla í búnaðinum. Tesla segist hafa lagað gallann með uppfærslu á tölvubúnaðinum en slys vegna sjálfstýringarbúnaðarins og sjálfvirku stýringaraðstoðarinnar halda áfram að safnast upp.
Raunin virðist þó önnur á Íslandi, Teslur lenda ekki í fleiri árekstrum en aðrar bílategundir. Í samskiptum Mannlífs við Samgöngustofu Íslands kom í ljós að enginn marktækur munur er á bílategundum þegar kemur að árekstrum.
