Bandaríski rapparinn Mystikal, sem heitir réttu nafni Michael Lawrence Tyler, hefur verið dæmdur í 20 ára fangelsi eftir að hafa játað sekt sína í nauðgunarmáli sem kom upp árið 2022.
Dómurinn var kveðinn upp í Louisiana-ríki í Bandaríkjunum. Fórnarlambið lýsti því fyrir dómi hvernig Tyler hefði beitt hana grófu ofbeldi á heimili sínu árið 2022, meðal annars með því að kyrkja hana, berja og nauðga henni. Hún fór fram á að hann hlyti hámarksrefsingu.
Tyler játaði í síðasta mánuði sök í nauðgun samkvæmt samkomulagi við saksóknara. Við dómsuppkvaðningu sagði hann að ef hann hefði gert það sem honum væri gefið að sök ætti hann skilið hámarksrefsingu.
Hámarksrefsing fyrir brotið er 25 ára fangelsi, en dómari ákvað að dæma hann í 20 ára fangelsi.
Þetta er ekki í fyrsta sinn sem Tyler kemst í kast við lögin vegna kynferðisbrota. Árið 2003 var hann sakfelldur fyrir kynferðisbrot gegn einstaklingi sem talinn var sérstaklega varnarlaus vegna heilsufars síns. Hann afplánaði þá nokkurra ára fangelsisdóm og var látinn laus árið 2010.
Eftir þá sakfellingu var Tyler skráður sem kynferðisbrotamaður til æviloka samkvæmt bandarískum lögum. Nýi dómurinn markar enn eitt alvarlegt áfall á ferli rapparans, sem naut mikilla vinsælda á tíunda áratugnum og í byrjun þessarar aldar.
