Tveir starfsmenn sjúkrastofnunar í Vestmannaeyjum hafa nú verið handteknir vegna rannsóknar á grunsamlegu andláti á sjúkrastofnuninni. Annar þeirra er yfirmaður á heimilinu.
Samkvæmt heimildum Mannlífs er sjúkrastofnunin hjúkrunar- og dvalarheimilið Hraunbúðir. Þar er heimild er fyrir 32 hjúkrunarrýmum, tveimur dvalarrýmum og einu hvíldarrými.
Mannlíf hefur reynt að ná tali af fjölda manns vegna málsins sem bera ábyrgð tengda málinu og stofnunum sem viðkoma því, þar á meðal Jóni Gunnari Þórhallssyni, yfirlögregluþjóni hjá lögreglunni á Suðurlandi, sem fer með rannsókn málsins, deildarstjóra og hjúkrunarforstjóra Hraunbúða.
Þegar þetta er skrifað hefur Heilbrigðisstofnun Suðurlands, sem Hraunbúðir heyra undir, ekki gefið neinar upplýsingar um málið og ekki næst í yfirmenn stofnunarinnar.
Starfsmaður hjúkrunarheimilisins sagði aðspurður starfsfólkið vera í sjokki, en vildi að öðru leyti ekki tjá sig um málið. „Já, væntanlega,“ svaraði starfsmaðurinn. Ekki náðist samband við yfirmenn, sem fyrr segir.
Fram hefur komið að rannsakað sé andlát vegna lyfjagjafar. Samkvæmt heimildum Mannlífs eru málefni Hraunbúða altöluð í Vestmannaeyjum, bæði árangur með sjúklinga og starfsmannamál.
Tvisvar kvartað yfir yfirmanni Hraunbúða
Heimildir Mannlífs herma að tveir starfsmenn hafi kvartað áður undan kynferðislegri áreitni frá kvenkyns yfirmanni hjúkrunarheimilisins en DV sagði frá málinu í apríl árið 2024.
Samkvæmt frétt DV kvartaði ungur karlkyns starfsmaður heimilisins undan kynferðislegri áreitni árið 2023 og það sama gerði ungur kvenkyns starfsmaður Hraunbúða árið 2024.
Kvenkyns starfsmaðurinn fór mikinn á TikTok á sínum tíma þar sem hún sagði frá áreitninni en hefur nú eitt þeim myndskeiðum. Þar sagði hún meðal annars:
„Þú gekkst langt yfir mörk sem yfirmaður með því að fokking káfa á mér og reyna að fokkings slumma upp í mig.“
Bæði málin komu upp á skemmtun starfsmanna Hraunbúða en í hvort skiptið var yfirmanninum sagt upp eða færður í starfi. Hún fór þó í sex vikna leyfi eftir að seinna málið kom upp en snéri eftir það aftur til starfa.
Samkvæmt heimildum DV var mikil ólga meðal starfsfólks Hraunbúða vegna málanna.
Yfirmaður á Hraunbúðum sagði hins vegar í Facebook-viðtali við Heilbrigðisstofnun Suðurlands í september 2024 að starfsandi væri „einstakur“.
