Þýsk fyrirsæta sem hefur verið saknað í tæplega ellefu ár er nefnd í skjölum sem tengjast auðkýfingnum og kynferðisbrotamanninum Jeffrey Epstein. Þetta kemur fram í umfjöllun þýska vikuritsins Der Spiegel og sjónvarpsstöðvarinnar ZDF.
Konan, sem aðeins er nefnd Michele í umfjölluninni, hvarf sporlaust árið 2015 þegar hún var 22 ára gömul. Hún yfirgaf heimili fjölskyldu sinnar í september það ár og hefur ekkert spurst til hennar síðan.
Samkvæmt frétt Der Spiegel hafði Michele um langt skeið verið í sambandi við fyrirsætumiðlarann Daniel Siad, sem sagður er hafa átt tengsl við Epstein. Hún hafi dvalið í Dúbaí og víðar erlendis áður en hún hvarf.
Siad er nú til rannsóknar í Frakklandi þar sem hann er sakaður um að hafa aðstoðað Epstein við mansal og misnotkun kvenna. Hann hefur neitað öllum ásökunum.
Í umfjöllun Der Spiegel kemur fram að nafn Siad komi ítrekað fyrir í skjölum sem tengjast Epstein. Þar hafi hann meðal annars sent Epstein ljósmyndir af konum ásamt upplýsingum um líkamsvexti þeirra og hrósað útliti þeirra.
Meðal þeirra mynda sem Siad sendi Epstein voru myndir af Michele. Í einum tölvupósti á hann að hafa skrifað um hana að Epstein myndi „elska hana“. Hins vegar segir í umfjölluninni að engar sannanir liggi fyrir um að þau hafi nokkurn tímann hist.
Tveir fyrrverandi aðstoðarmenn Epsteins, sem Der Spiegel hafði samband við, sögðust aldrei hafa séð Michele. Tilraunir fjölmiðlanna til að ná tali af Siad og lögmanni hans báru ekki árangur.
Móðir Michele segir að nýjar upplýsingar hafi aukið áhyggjur fjölskyldunnar um afdrif dóttur hennar. Hún óttast að Michele sé ekki lengur á lífi og telur mögulegt að eitthvað hafi komið fyrir hana.
Jeffrey Epstein lést í fangelsi árið 2019 þar sem hann beið réttarhalda vegna ákæra um mansal og kynferðislega misnotkun ólögráða stúlkna. Málið vakti mikla athygli um allan heim og tengdist fjölda áhrifamikilla einstaklinga.
