Lögreglan í Kentwood í Michigan-ríki í Bandaríkjunum hefur birt upptökur úr eftirlitsmyndavélum sem sýna hrottalega árás á 14 ára stúlku á götu úti um hábjartan dag fyrr í þessum mánuði. Maðurinn sem er grunaður um árásina var handtekinn innan sólarhrings.
Atvikið átti sér stað þann 12. maí þegar stúlkan var á gangi eftir gangstétt í íbúðahverfi í Kentwood. Á myndskeiðinu sést dökkur jeppi nema staðar við gangstéttina áður en ökumaðurinn, 29 ára gamall maður að nafni John Moore, hleypur út úr bifreiðinni og ræðst að stúlkunni.
Samkvæmt upplýsingum frá lögreglu reyndi Moore að halda stúlkunni niðri og sló í átt að henni. Stúlkan veitti hins vegar harða mótspyrnu og tókst að verjast árásinni. Lögreglan segir að hún hafi sært árásarmanninn áður en hann flúði vettvang á bifreið sinni.
Um einum og hálfum tíma síðar er Moore sagður hafa snúið aftur í sama hverfi þar sem hann réðist að 66 ára konu sem var við garðvinnu við heimili sitt.
Rannsóknarlögreglumenn höfðu uppi á Moore með aðstoð vitna og eftirlitsmyndavéla og var hann handtekinn innan við sólarhring eftir árásirnar. Hann var færður í fangageymslu í Kent-sýslu og ákærður meðal annars fyrir líkamsárás og ólögmæta frelsissviptingu.
Dómari hefur ákveðið að Moore skuli sæta tryggingu að upphæð 140 þúsund bandaríkjadala, jafnvirði um 19 milljóna íslenskra króna. Hann hefur ekki greitt trygginguna og situr því enn í gæsluvarðhaldi.
Að sögn lögreglu slösuðust brotaþolarnir ekki alvarlega í árásunum.
