Íslenska nóbelsskáldið Halldór Laxness fær lofsamlega umfjöllun í breska dagblaðinu The Guardian þar sem lesandi blaðsins segir frá reynslu sinni af því að lesa skáldsöguna Sjálfstætt fólk.
Umfjöllunin birtist í grein þar sem rithöfundar og lesendur Guardian segja frá þeim bókum sem þeir lásu í október. Þar eru meðal annars rithöfundarnir Ian Rankin og Louise Kennedy, en íslenska bókmenntaverkið vekur sérstaka athygli hjá lesanda að nafni Mark.
Mark segist hafa sett sér það markmið á árinu að lesa eingöngu bækur eftir höfunda utan hins enskumælandi heims og að velja höfund frá nýju landi í hvert sinn. Sú áskorun hafi leitt hann að Sjálfstæðu fólki, rúmlega 500 blaðsíðna skáldsögu um íslenska bændafjölskyldu.
Í bókinni fylgist lesandinn með lífi Bjarts í Sumarhúsum og fjölskyldu hans yfir um tveggja áratuga skeið á fyrri hluta 20. aldar. Mark segir söguna fjalla um þrengingar þrjósks bónda sem leggur allt undir til að standa á eigin fótum og varðveita sjálfstæði sitt og jarðar sinnar.
Hann viðurkennir að hafa búist við afar þungri og drungalegri lesningu. Bókin sé vissulega þannig á köflum, ekki síst þegar dauðinn ber að garði, en húmorinn hafi komið honum á óvart. Sérstaklega nefnir hann kaldhæðni persónanna og samskipti þeirra.
Mark hrósar einnig lýsingum Laxness á íslenskri náttúru og árstíðunum og segir þær skapa sterkt andrúmsloft í verkinu. Náttúran og áhrif hennar á lífið á bænum verði nær áþreifanleg í frásögninni.
Þá fær enska þýðing bókarinnar, eftir JA Thompson í samstarfi við Laxness sjálfan, mikið lof. Mark segir lestur þýddra bókmennta á árinu hafa kennt sér að meta góðar þýðingar og lýsir ensku útgáfu Sjálfstæðs fólks einfaldlega sem stórkostlegri.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir