Donald Trump Bandaríkjaforseti sagði í viðtali í gær að Bandaríkin myndu „100%“ innlima Grænland og sagðist ekki útiloka að beita hervaldi.
Agli Helgasyni fjölmiðlamanni er nóg boðið og vill að Íslendinga láti í sér heyra.
„Þetta er komið út fyrir allan þjófabálk - að hafa í sífelldum hótunum við friðsælt, vita meinlaust, vinveitt lýðræðisríki. Jafnvel að senda á það herlið,“ segir Egill á Facebook.
„Við Íslendingar getum heldur ekki sætt okkur við þessa framkomu gagnvart vinum okkar á Grænlandi.“
Fjölmargir taka undir með Agli.
Björn Valur Gíslason, fyrrverandi þingmaður VG, gagnrýnir stuðningsleysi Norðurlandanna.
„Forsætisráðherrar Norðurlandanna og pólitísk forystusveit þeirra mætti vera mun skýrari í stuðningi sínum við Grænlendinga og heimsækja landið heim í þeim tilgangi að sýna þeim stuðning,“ segir hann.
„Af hverju hefur íslenska ríkissstjórnin ekki heimsótt Grænland og lýst yfir stuðningi við það?“ spyr Elísabet Jökulsdóttir rithöfundur.
Donald Trump sagði í gær að honum væri sama hvaða skilaboð það myndi færa að taka yfir Grænland. „Ég hugsa ekki um það. Mér er í rauninni alveg sama. Grænland er allt öðruvísi mál. Þetta er alþjóðlegur friður. Alþjóðlegur friður og styrkur.“ Hann heldur því fram að innlimun Grænlands í Bandaríkin sé nauðsynleg vegna skipasiglinga Rússa og Kínverja í norðurhöfum.
Ríkisstjórn Íslands hefur talað varlega um aðfarir Bandaríkjanna að Grænlandi. Þorgerður Katrín Gunnarsdóttir utanríkisráðherra sagði þó í gær að heimsókn JD Vance til Grænlands væri „frekar dapurleg“. „Það verður aldrei nógu oft sagt að það á virða fullveldi ríkja. Það á að virða alþjóðalög,“ sagði hún við RÚV.
„Danmörk og Grænland eru í norrænu fjölskyldunni. Líkt og Ísland og önnur Norðurlönd er allt ríki Danmerkur hluti af NATO, þar sem bandamenn vinna þétt saman við að styrkja öryggi á Norðurslóðum. Gagnkvæm virðing og samvinna bandamanna er eina leiðin fram á við,“ skrifaði hún á samfélagsmiðlinum X, sem er í eigu Elons Musk, stuðningsmanns og samstarfsmanns Trumps.
Trump virðist ekki hafa tekið það til sín. Sama dag sagðist hann ekki útiloka að beita hervaldi til að komast yfir Grænland.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.



























Athugasemdir