Hver er morðinginn?

Murder on the Orient Express var nýlega frum­sýnd í kvik­mynda­húsum lands­ins, en myndin er byggð á vin­sælli skáld­sögu rit­höf­und­ar­ins Agöthu Christie.

Engin und­an­komu­leið
Murder on the Orient Express var nýlega frum­sýnd í kvik­mynda­húsum lands­ins. Hér er á ferð­inni end­ur­gerð af frægri mynd sem kom út árið 1974 byggð á sögu Agöthu Christie. Belgíski leynilög­reglu­mað­ur­inn sér­vitri Hercule Poirot er á leið til Vestur-Evrópu á fyrsta far­rými Aust­ur­landa­hrað­lest­ar­innar. Nótt eina er einn af far­þeg­unum myrtur í svefni og þar sem lestin er teppt vegna snjó­skriðu sem hylur lestar­tein­ana fær Hercule tíma og tæki­færi til að rann­saka málið, raða saman sönn­un­ar­gögn­unum og finna morð­ingj­ann áður en lög­reglan kemur um borð. Myndin skartar úrvalsliði leik­ara svo sem Johnny Depp, Judi Dench og Penelope Cruz en í þetta sinn fer Kenneth Brannagh með hlut­verk Poirot.

Uppi og niðri
Í mynd­inni Gosford Park má glöggt sjá stétta­skipt­ing­una sem ríkti í Englandi á árum áður. Á efri hæðum sveita­set­urs­ins býr Sir William McCordle ásamt mun yngri eig­in­konu sinni Lady Sylviu. Þau lifa hinu ljúfa lífi og skemmta sér við skot­veiðar, útreiðar og veislu­höld. Niðri vinna þjón­arnir baki brotnu undir stjórn yfir­þjóns­ins Mr. Jennings og hús­freyj­unnar fröken Wilson. Hvort sem þeim líkar það vel eða illa þá vita allir hver þeirra staða er. Einn góðan dag breyt­ist allt þegar Sir William býður í skot­veiði­veislu og vinir hans og þjónar þeirra hleypa öllu í bál og brand. Þar með hefst saga af lygum, svikum, hefnd, bit­urð, pen­ingum og ást – og svo auð­vitað morði.

Glæpur eða leikur
Smá­þjóf­ur­inn Harry Lockhart er á flótta í Los Angeles undan lög­regl­unni eftir mis­heppnað rán en ratar óvart í leikprufu fyrir hlut­verk rann­sókn­ar­lög­reglu­manns í kvik­mynd. Hann fær hlut­verkið og er boðið í ekta Hollywood-partí. Þar hittir hann einka­spæj­ar­ann Perry van Shrike sem stingur upp á að hann taki þátt í því að rann­saka glæp til að und­ir­búa sig fyrir hlut­verkið. Harry og Petty flækj­ast inn í flókið morð­mál. Kiss Kiss Bang Bang er skemmti­leg mynd í nýtísku­legum noir-stíl.

Humphrey Bogart og Lauren Bacall í hlut­verkum sínum í The Big Sleep.

Flækjur
Í klass­ísku kvik­mynd­inni The Big Sleep, sem er byggð á vin­sælum bókum Raymond Chandler, kynn­umst við einka­spæj­ar­anum Philip Marlowe. Hann er í upp­hafi ráð­inn af afar ríkri fjöl­skyldu til að stöðva fjár­kúg­ara sem hefur verið að áreita yngri syst­ur­ina, Carmen. Eldri systirin, Vivian, vill þó meina að faðir hennar hafi ráðið Marlowe til að rann­saka allt annað mál. Með tím­anum flæk­ist málið til muna, og sögu­þráður mynd­ar­innar með, og á end­anum er það orðið að morð­gátu.

Myndin From Hell fjallar um hið alræmda mál raðmorð­ingj­ans Jack the Ripper sem lék lausum hala í London árið 1888.

Fræg fjöldamorð
Myndin From Hell fjallar um hið alræmda mál raðmorð­ingj­ans Jack the Ripper sem lék lausum hala í London árið 1888. Jack myrti ein­göngu vænd­is­konur í Whitechapel-hverf­inu í London. Við fylgj­umst við rann­sókn­ar­lög­reglu­mönn­unum Fred Abberline og Peter Godley við rann­sókn máls­ins. Þeir félagar kynn­ast vænd­is­konum sem eru vin­konur fórn­ar­lamba og hafa sína sögu að segja. Abberline er ópíum­fík­ill og þyk­ist sjá inn í fram­tíð­ina. Hann verður jafn­framt ást­fang­inn af Mary Kelly, einni vænd­is­kon­unni, og vill skilj­an­lega leysa málið áður en hún fellur fyrir hendi morð­ingj­ans.

Höfundur / Hildur Frið­riks­dóttir