Jóninna Margrét lést af völdum COVID-19: „Hún var afskaplega vönduð og góð kona og minn allra besti vinur“

Jóninna Margrét Pét­urs­dóttir, lést á Land­spít­al­anum 23. mars, 71 árs að aldri. Jóninna lést af völdum COVID-19 kór­óna­veirunnar, og er fyrsti íslend­ing­ur­inn sem deyr af völdum heims­far­ald­urs­ins. Var hún flutt mikið veik á LSH viku áður, 16. mars, en fram að því hafði hún ekki sýnt nein ein­kenni veirunnar.

Eig­in­maður hennar, sem er 75 ára gam­all, liggur á gjör­gæslu LSH mikið veikur, en ástand hans hefur verið stöðugt síð­ustu daga.

Þröstur Reyn­is­son sonur hjón­anna, skrif­aði færslu í Facebook-hóp­inn Kór­ónu­veiran-COVID-19 dag­inn eftir and­lát móður sinnar, þar sem hann hvatti fólk til að taka ástand­inu alvar­lega og hætta að haga sér eins og hálf­vitar:

„Sjálf­sagt er flestum að verða ljóst að litla landið okkar hefur þurft að þola sitt fyrsta dauðs­fall af völdum Covid 19 veirunnar, þó dauðs­fall í fjöl­skyld­unni sé mikið einka­mál fyrir flesta þá langar mig að sem flest okkar læri eitt­hvað af þessu. Þetta er mamma mín, hún barð­ist í heila viku fyrir lífi sínu smituð af Covid-19 veirunni, hún var í áhættu­flokki eins og mjög margir aðrir. Þrír úr minni fjöl­skyldu höfðu tæki­færi til að kveðja hana fyrir enda­lokin. Tveir þeirra vegna þess að þeir eru smit­aðir af veirunni og ein sem lagði sig í mikla smit­hættu, ég hefði alveg þegið að fá að horfa í augu hennar og segja bless en vegna aðstæðna var það ekki hægt. Í stað­inn fæ ég að minn­ast hennar eins og ég sá hana síð­ast og fékk að kveðja hana í gegnum sím­ann og ekka­sog. Það er alveg kom­inn tími til að þessi þjóð og þegnar hennar taki þessu alvar­lega og hætti að haga sér eins og hálf­vitar.“

„Hún var ein þegar andlátið bar að garði“

Í við­tali við Stundina í dag segir Þröstur að mjög erfitt sé að vita til þess að móðir hans hafi verið ein þegar hún kvaddi. Þröstur gat ekki kvatt móður sína á dán­ar­beð­inu og tal­aði síð­ast við hana í síma á laug­ar­deg­inum, faðir hans, elsti bróðir og frænka hittu hana hins vegar. „Mér skilst að hún hafi þó getað heyrt í ansi mörgum í gegnum síma. En hún var ein þegar and­látið bar að garði. Það er mjög erfitt að vita til þess, þetta er nú ein birt­ing­ar­mynd þess hvaða áhrif þessi veira hefur,” segir Þröstur við Stundina og telur hann að móðir hans hafi vitað að hverju dró í veik­indum sínum.

Jóninna var astma­sjúk­lingur, en sjúk­dóm­ur­inn hafði ekki áhrif á dag­legt líf hennar, hún tók sín lyf og lifði eðli­legu og virku lífi, að sögn Þrastar. Hið sama er um föður hans að segja, hann hafi ekki glímt við nein veik­indi þar til hann smit­að­ist af COVID-19 kór­óna­veirunni.

„Hún var afskap­lega vönduð og góð kona og minn allra besti vinur,“ segir Þröstur um móður sína heitna.

Þröstur brýnir fyrir fólki að veiru­sýk­ingin sé dauð­ans alvara og allir, með engum und­an­tekn­ingum, verði að hlýða fyr­ir­mælum heil­brigð­is­yf­ir­valda, fyrir sig sjálfa og fyrir með­borg­ar­ana.

Lesa má við­talið við Þröst í Stund­inni hér. 

Samkvæmt upp­lýs­ingum á covid.is í dag kl. 13 eru stað­fest smit hér á landi 1.086, 30 liggja á sjúkra­húsi, þar af tíu manns á gjör­gæslu. 9.236 manns eru í sótt­kví og 927 eru í ein­angrun. 139 manns er batnað og 5.427 manns hafa lokið sótt­kví.