Nettó ræður inn fjölda starfsmanna til að anna eftirspurn í netverslun: Allt að tveggja sólarhringa bið eftir afgreiðslu

Nettó hefur ráðið inn rúm­lega 50 nýja starfs­menn, þar af 20 bíl­stjóra, og keypt yfir tíu nýja bíla til að anna mik­illi eft­ir­spurn í net­verslun fyr­ir­tæk­is­ins. Bílarnir bæt­ast við þá sem fyrir eru af fyr­ir­tæk­inu Aha, sam­starfs­að­ila Nettó í net­versl­un­inni.

„Við­skipta­vinir okkar hafa verið einkar skiln­ings­ríkir á þessum óvissu­tímum og þeir eiga hrós skilið. Það hafa komið tíma­bil þar sem töf hefur orðið of mikil þar sem inn­viðir okkar réðu ein­fald­lega ekki við álagið. Á hverjum degi koma nýjar áskor­anir og okkur hefur tek­ist að aðlaga verk­ferla okkar og skipu­lag að þessum breyttu aðstæðum. Eins og staðan er nú er allt að tveggja sól­ar­hringa bið eftir afgreiðslu hjá okkur en það er heldur stuttur tími sam­an­borið við Danmörku og England þar sem er allt að tveggja vikna bið eftir mat­vörum úr net­verslun,“ segir Gunnar Egill Sig­urðs­son, fram­kvæmda­stjóri versl­un­ar­sviðs Samkaupa, í frétta­til­kynn­ingu.

Á vef fyr­ir­tæk­is­ins birt­ist til­kynn­ing um tafir í net­verslun:
Vöru­af­hend­ing – vef­verslunTafir á afhend­ingu vegna eft­ir­spurnar
Gríð­ar­leg eft­ir­spurn er eftir vörum úr net­verslun Nettó og mega við­skipta­vinir búast við töfum á afhend­ingu næstu daga á höf­uð­borg­ar­svæð­inu. Fleiri pant­anir sem munu ber­ast í dag verða afgreiddar við fyrsta tæki­færi á morgun. Við látum vita þegar afgreiðslu­tím­inn verður kom­inn í rétt horf aftur.

Þökkum fyrir skiln­ing­inn.
Bestu kveðjur,
Starfs­fólk Nettó

Tekið opnum örmum í Borgarnesi og á Selfossi

Nettó hóf nýlega að keyra út vörur í Borg­ar­nesi og á Selfossi. „Okkur hefur verið tekið opnum örmum bæði í Borg­ar­nesi sem og á Selfossi. Nú erum við að skoða með hvaða hætti við getum stækkað net­verslun okkar til að mæta þeirri auknu eft­ir­spurn sem við spáum næstu vikur og mán­uði. Ástandið nú hefur ýtt undir vit­und fólks á að geta almennt pantað dag­vöru gegnum netið, fá hana heimsenda eða sækja í verslun. Mig grunar að fólk um land allt eigi eftir að horfa öðru­vísi á inn­kaup á dag­vöru þegar við komumst í gegnum þessa for­dæmu­lausu tíma og hlufall net­versl­unar nái áður óþekktum hæðum,“ segir Gunnar.