Ráðstafanir líkamsræktarstöðva vegna samkomubanns – Reebok Fitness skellir í lás og viðskiptavinir Sporthússins hvattir til að fara í sturtu heima

Sam­komu­bann hér á landi tók gildi á mið­nætti og verður í gildi næstu fjórar vikur. Það þýðir að sam­komur þar sem fleiri en 100 koma sama eru bann­aðar. Lík­ams­rækt­ar­stöðvar lands­ins hafa gripið til ýmissa ráð­staf­ana vegna útbreiðslu COVID-19 og sam­komu­banns­ins.

Stöðvar World Class verða áfram opnar og opn­un­ar­tími helst óbreyttur en hámarks­fjöldi í hóp­tíma­sali verður lækk­aður um 50%. Við­skipta­vinir eru þá beðnir um að halda tveggja metra fjar­lægð við hvorn annan. Eins eru við­skipta­vinir World Class beðnir um að deila ekki bún­aði með öðrum og sótt­hreinsa áhöld og búnað eftir notkun.

„Við aukum rými milli iðk­enda og verður því ein­ungis annað hvert upp­hit­un­ar­tæki í boði,” segir í til­kynn­ingu World Class.

Hreyfing verður áfram opin en frá og með deg­inum í dag hefur hámarks­fjöldi í hóp­tímum verið lækk­aður um helm­ing og við­skipta­vinir eru minntir á að halda tveggja metra fjar­lægð frá hvorum öðrum.

Á vef Hreyf­ingar segir að sótt­hreinsun og hrein­læti hafi verið tekið föstum tökum sem aldrei fyrr.

Lík­ams­rækt­ar­stöðin Reebok Fitness verður lokuð á meðan á sam­komu­bann­inu stendur. Á vef Reebok Fitness segir að ákvörð­unin hafi verið „þung­bær” fyrir stjórn­endur fyr­ir­tæk­is­ins.

Sport­húsið verður áfram opið á meðan á sam­komu­banni stendur en þjón­ustan verður tak­mörkuð er fram kemur á vef stöðv­ar­innar.

„Til að geta veitt þessa tak­mörk­uðu þjón­ustu höfum við gert tals­verðar ráð­staf­anir sem geta reynt á þol­in­mæði okkar allra, meðal þess er að gefa hverjum við­skipta­vini rúmt svig­rúm (a.m.k. tvo metra á milli fólks) til að stunda æfingar. Á það við í öllum rýmum okkar.”

Þar segir að starfs­fólk Sport­húss­ins muni hafa eft­ir­lit með fjölda fólks í hverju rými og að hámarks­fjöldi á hverju svæði verði aug­lýstur hverju sinni. „Ef þú hefur svig­rúm til þess að fara í sturtu heima, þá er það vel þegið,” segir á vef Sport­húss­ins.