Leggja til að verkferlar Neyðarlínunnar verði endurskoðaðir – „Þannig að borgarar landsins geti treyst því að ekki sé farið í manngreinarálit“

Stjórn land­sam­tak­anna Geð­hjálpar hefur nú sent frá sér ályktun þar sem lagt er til að allir lög­reglu­menn fái þjálfun og kennslu í því að fást við ein­stak­linga í geð­rofs­á­standi. Geðhjálp sendir til­kynn­ing­una frá sér í kjöl­far þess að Kompás fjall­aði í gær um unga konu sem lést í apríl í fyrra eftir átök við lög­reglu­menn sem höfðu afskipti af henni þegar hún var í geð­rofs­á­standi.

Þáttur Kompás sem sýndur var á Vísi í gær hefur vakið mikla athygli. Í þætt­inum er fjallað um and­lát Heklu Lindar Jóns­dóttir sem lést síð­ast­liðið vor. Í þætt­inum er rætt við for­eldra Heklu sem telja lög­reglu hafa farið offari við hand­tök­una.

Í ályktun Geð­hjálpar segir að geð­rof sé grafal­var­legt ástand. Þar segir einnig að orsakir geð­rofs geti verið marg­vís­legar og þá er þung­lyndi, floga­veiki, áfengis – og vímu­efna­neysla, svefnskortur, elli­glöp og heila­æxli tekið sem dæmi.

„Ein­stak­lingar í geð­rofi eiga það hins vegar allir sam­eig­in­legt að þurfa á hjálp að halda og það sem allra fyrst. Það skýtur því skökku við að heyra aðstoð­ar­fram­kvæmda­stjóra Neyð­ar­lín­unnar full­yrða það að öllum verk­ferlum hafi verið fylgt þegar ákveðið var að senda ekki sjúkra­flutn­inga­menn á stað­inn þegar neyð­ar­kall barst vegna ungrar konu í geð­rofi heldur aðeins kalla eftir lög­reglu,“ segir meðal ann­ars í ályktun Geð­hjálpar.

Hekla Lind hafði neytt eit­ur­lyfja og var í geð­rofs­á­standi þegar vinur hennar taldi hana þurfa á lækn­is­að­stoð að halda þann 9. apríl. Hann hringdi á sjúkra­bíl en sjúkra­bíll­inn kom aldrei. Hins vegar mættu tveir lög­reglu­menn á vett­vang.

Í ályktun Geð­hjálpar segir að sú stað­reynd að sjúkra­bíll hafi ekki verið sendur á stað­inn lýsi for­dómum. „Þetta sjón­ar­mið lýsir miklum for­dómum gagn­vart ákveðnum hópi í sam­fé­lag­inu, sem birt­ist m.a. í þess­ari mis­munun, og veldur það stjórn Geð­hjálpar miklum áhyggjum.“

Í álykt­un­inni er þá lagt til að  óháðir aðilar verði fengnir til að taka út mats­með­ferð og verk­ferla Neyð­ar­lín­unnar „þannig að borg­arar lands­ins geti treyst því að ekki sé farið í mann­grein­ar­á­lit og þegar óskað er eftir aðstoð í neyð“.

„Stjórn Geð­hjálpar fer einnig fram á það að verk­ferlar lög­reglu verði teknir til end­ur­skoð­unar og að allir lög­reglu­menn fái þjálfun og kennslu í því að fást við ein­stak­linga í geð­rofs­á­standi.“

Álykt­un­ina má lesa í heild sinni hér fyrir neðan: