„Flugfreyjur eru ekki svísur með há laun sem eru alltaf í útlöndum að versla“

Flestar flug­freyjur hér á landi telja að ímynd starfs þeirra sé alls ekki í sam­ræmi við raun­veru­leik­ann. Þær þurfi ítrekað að takast á við grófa kyn­ferð­is­lega áreitni, ofþreytu og virð­ing­ar­leysi gagn­vart starf­inu.

Árið 2017 lauk Andrea Eyland námi frá Háskól­anum á Bifröst og í MA-rit­gerð sinni ræddi hún við átta íslenskar flug­freyjur um ímynd­ina og dýrð­ar­ljóman sem starf­inu virð­ist fylgja. Við­mæl­end­urnir höfðu ýmist starfað hjá Icelandair eða WOW air og var lengsti starfs­ald­ur­inn í hópnum 10 ár. „Ég var sjálf að vinna sem flug­freyja hjá WOW þegar það byrj­aði og svo nokkrum árum seinna hjá Icelandair. Mér fannst ég alltaf svo þurrausin eftir flug og skildi varla af hverju, af því ég elskaði að fljúga og fannst vinnan svo skemmti­leg. Þetta var meira en þreyta vegna þeys­ings um gang­inn og ég vildi vita hvað tók svona mikið af mér,“ sagði Andrea í sam­tali við DV.

Í sam­tölum Andreu við flug­freyj­urnar kemur fram að sumar þeirra hafi til­kynnt sig frá vinnu vegna ofþreytu. Þeir segj­ast raun­veru­lega sjaldn­ast vera í fríi þar sem frídag­arnir nýtast í hvíld eftir flug og fyrir það næsta. Flug­fé­lögin geri ríka kröfum um að flug­freyj­urnar séu ávallt úthvíldar, ferskar og fínar. „Það gleym­ist að taka inn í mynd­ina þreyt­una. Þessa enda­lausu þreytu. Ímyndin er af skvísu með há laun sem er alltaf í útlöndum að versla. Það er ekk­ert glæsi­legt að þrífa upp ælu eftir veikan far­þega eða standa undir öskrum frá reiðum far­þega,“ sagði einn við­mæl­andi Andreu í rit­gerð­inni.

Líkt og Mannlíf hefur greint frá standa flug­freyjur í harðri kjara­bar­áttu við Icelandair sem reynir að rétta skút­una af og tryggja rekstur flug­fé­lag­is­ins. Félagið stefnir að hluta­fjár­út­boði dag­ana 29. júní til 2. júlí og mun reyna að loka samn­ingum við flug­freyjur félags­ins fyrir þann tíma. Andrea segir umræð­una oft á tíðum á villi­götum. „Flug­fé­lögin eru oft fárán­leg þegar þau koma fram í fréttum um laun flug­freyja. Þetta fólk eyðir helm­ingi mán­aðar burtu frá fjöl­skyldum sínum og þegar flug­freyjur eru ekki í vinn­unni eru þær þreyttar eftir flugið eða að hvíla sig fyrir næsta flug.“

Þrátt fyrir ítrek­aðar til­raunir náð­ist ekki á Guðlaugu Líney Jóhanns­dóttur, for­mann Flug­freyju­fé­lags Íslands, við vinnslu frétt­ar­innar.