„Þetta eru furðulegir tímar og það sem áður þótti sjálfsagt er bannað í dag. Eins og til dæmis að bjóða upp á lifandi tónlist á veitingastað. Breyttar aðstæður kalla á nýjar nálganir og því verðum við með Live Stream tónleika hér í Mið-Ameríku,“ segir Héðinn Svarfdal veitingamaður á Kosta Ríka.
„Öll framlög eru því vel þegin.“
Héðinn rekur lítinn veitingastað, Xanadu Café & Grill, við ströndina á Kosta Ríka ásamt eiginkonu hans Elvu Sturludóttur. Þar hafa þau boðið fátæku fólki upp á ókeypis mat og til að geta hjálpað enn frekar frekar fátækum í landinu bjóða þau upp á tónleika á morgun með hjálp internetsins. Hér getur þú fundið atburðinn á Facebook-síðu staðarins en tónleikarnir fara fram klukkan 17 síðdegis á morgun að íslenskum tíma. „Markmiðið er sem sagt annars vegar að bjóða tónlistarfólki hér upp á tækifæri og svo hins vegar að safna peningum fyrir mat handa fátæku fólki,“ segir Héðinn.
Héðinn segist með tónleikunum ná að slá tvær flugur í einu höggi. Að bjóða upp á góða afþreyingu og styrkja gott málefni í leiðinni. Til að geta veitt veitt fátækum sem mesta aðstoð vonast veitingahjónin íslensku eftir framlögum frá Íslendingum. „Við erum í samstarfi við eina skærustu stjörnu þessa svæðis, Fatiniza frá Kólumbíu, og framleiðsufyrirtæki hér á þessum slóðum. Peningagjafir fara fyrst í að borga hljómsveitinni smá laun og eftirstöðvarnar í að styrkja fátæka og svanga á þessum slóðum. Öll framlög eru því vel þegin,“ segir Héðinn.
Hér getur þú styrkt tónleikana og um leið fátæka íbúa á Kosta Ríka með PayPal. Þá er einnig hægt að veita framlag inná á eftirfarandi styrktarreikning: 515-26-404989, kennitala 151274-4989.
Athugasemdir