Inga Sæland, formaður Flokks fólksins, ætlar að berjast hart gegn því sem hún kallar hörmulegt þingmál sem heimili einstaklingum að ferðast til Íslands í fóstureyðingu. Hún segir frumvarpið vekja með sér bæði hrylling og sorg.
Skoðun Ingu kemur fram í aðsendri grein í Morgunblaðinu sem hún kallar „Fóstureyðingamiðstöðin Ísland?“. Í þingmálinu segir hún kristallast hvíllíkan hroka, hræsni og lífsfyrirlitningu þeirra sem að málinu standa. „Búið er að dreifa hörmulegu þingmáli á Alþingi. Máli sem vekur með mér bæði hrylling og sorg. Máli sem fær mig til að hugsa um á hvaða vegferð við séum sem þjóð,“ segir Inga og bætir við:
„Alls eru 19 þingmenn sem flytja frumvarpið en fyrsti flutningsmaður er Rósa Björk Brynjólfsdóttir, þingmaður utan flokka. Annar utanflokkaþingmaður og þingmenn frá Vinstri grænum, Samfylkingu, Viðreisn og Pírötum eru með. Þarna eru m.a. Þorgerður Katrín Gunnarsdóttir, formaður Viðreisnar, Logi Már Einarsson, formaður Samfylkingar, og Guðjón Brjánsson, annar varaforseti Alþingis. Nú vilja þessir þingmenn, og líklega flestir flokksfélaga þeirra á þingi, að Ísland verði eins konar fríríki fóstureyðinga í Evrópu.“
„Lýðskrumið, tvöfeldnin, hræsnin, hrokinn og lífsfyrirlitningin sem kristallast í þessari þingsályktunartillögu er með slíkum ólíkindum að ég er nánast kjaftstopp og gerist nú ekki oft“
Inga er þeirrar skoðunar að ekki sé meiru hægt að bæta á íslenska heilbrigðiskerfið sem þegar berjist í bökkum vegna álags og fjárskort. Þá finnst henni fáránlegt að bjóða hingað fólki sem vill komast framhjá lögum í eigin heimalandi. „Þessi tillaga er nú komin fram hér í okkar landi þar sem Alþingi samþykkti illu heilli í fyrra, að heimila fóstureyðingar allt til loka 22. viku meðgöngu. Þá er fóstur orðið fullsköpuð lítil manneskja sem bíður þess að fá að koma í heiminn. Þetta skal gert undir fána mannréttinda og kvenfrelsis. Þetta er sama fólkið og galar hátt um mannréttindi flóttabarna. Um leið hunsar það mannréttindi og lífsrétt ófæddra barna,“ segir Inga og heldur áfram:
„Þetta eru alþingismenn sem telja það sjálfsagt að Ísland sé með þessu að hafa bein afskipti af innanríkismálum fullvalda lýðræðisríkis eins og Póllands í þessu tilviki. Lýðskrumið, tvöfeldnin, hræsnin, hrokinn og lífsfyrirlitningin sem kristallast í þessari þingsályktunartillögu er með slíkum ólíkindum að ég er nánast kjaftstopp og gerist nú ekki oft. Þetta munum við í Flokki fólksins aldrei samþykkja. ALDREI!“
Athugasemdir