Ingibjörg Dögg Kjartansdóttir, ritstjóri Stundarinnar, greinir frá því á Facebook-síðu sinni að hún hafi fengið hræðilega afmælisgjöf í dag. Það var krafa frá föður sem vill að hún borgi honum fimm milljónir í skaðabætur fyrir að hafa birt nafnlausa frásögn dætra hans í Stundinni. Hún segir ekki koma til greina að borga honum.
„Rétt í þessu barst mér afmælisgjöf, stefna frá föður sem vill að ég borgi honum fimm milljónir króna vegna þess að ég leyfði dætrum hans að segja sögu sína nafnlaust. Þær voru neyddar til að umgangast föður sinn, þrátt fyrir að hafa jafnt í dag sem í æsku greint frá því að hann hefði misnotað þær kynferðislega. Markmið systranna með frásögninni var að fá fólk til þess að taka raddir barna alvarlega, en hann ákvað að bregðast við frásögninni með því að draga mig persónulega og Stundina fyrir dóm fyrir að veita þeim vettvang til þess að tjá sig. Tveir dagar eru liðnir frá því að lögmaður þessa manns sendi greiðsluáskorun þar sem fimm milljóna var krafist á næstu sjö dögum, ellegar yrði greiðslan innheimt fyrir dómstólum. Nú hafa þau sent stefnu,“ segir Ingibjörg.
Ingibjörg segir þetta ekki einu slæmu tíðindin sem hún fengið í dag. „Fyrr í morgun fékk ég ábendingu um að Bryndís Schram hefði gert mig að umtalsefni í nýrri ævisögu sinni, þar sem mér skilst að hún fari ítrekað ófögrum orðum um mig. Meðfylgjandi var stuttur kafli þar sem ranglega var fullyrt að ég hefði haft umfjöllun Stundarinnar um frásagnir 23 kvenna um háttsemi Jóns Baldvins í undirbúningi árum saman. Kenningin byggði á því að ég tók viðtal við Aldísi Schram fyrir DV árið 2013. Bryndís veltir upp þeirri spurningu af hverju ég hafi ekki leitað álits hennar eða annarra fjölskyldumeðlima á þeim tíma, þegar álit þeirra lá fyrir,“ segir Ingibjörg og bætir við það:
„Viðbrögð fjölskyldunnar við umfjöllun um bréfasendingar Jóns Baldvins voru að benda á veikindi Aldísar, sem hafði ekkert með bréfasendingar föður síns að gera og hafði ekki einu sinni tjáð sig opinberlega um þessi efni á þeim tíma. Viðtalið við Aldísi var því tekið til þess að veita henni færi á því að svara fyrir ásakanir sem voru bornar á hana. Fyrir vikið virðist ég vera ein fjölmargra kvenna sem hjónin líta á sem hindrun í viðleitni þeirra til ímyndarsköpunar.
Þetta virðist vera algengt hjá Ingibjörgu, að þurfa að standa í stappi á afmælisdaginn. „Á Facebook fékk ég síðan áminningu um að fyrir þremur árum hófst afmælisdagurinn hjá héraðssaksóknara, sem leitaði uppljóstrara vegna umfjöllunar Stundarinnar um Glitnisskjölin sem þaggað var niður í með lögbanni. Síðar sama dag var afmælismyndin tekin í Héraðsdómi Reykjavíkur, en þangað var ég mætt með samstarfskonu minni sem var dregin fyrir dóm fyrir að greina frá ásökunum starfsmanna um kynferðislega áreitni af hálfu yfirmanns. Hann tapaði málinu, en hún hætti í fjölmiðlum,“ segir Ingibjörg.
Hún segir að maðurinn sem sendi henni kröfuna fyrr í dag ætti að líta í eigin barm. „Til að það liggi fyrir, þá kemur ekki til greina að greiða manninum fimm milljónir króna fyrir það eitt að dætur hans fengu að segja sögu sína nafnlaust, í umfjöllun studda gögnum, til að gagnrýna hvernig kerfið tók á hræðilegri reynslu þeirra af honum í bernsku. Fólk sem heimtar milljónir fyrir og reynir að þagga niður í börnunum sínum ætti að byrja á því að líta í eigin barm,“ segir Ingibjörg.
Hún segir þetta muni þó ekki skemma daginn hennar. „Í dag er afmæli og ég ætla að njóta dagsins með börnunum sem hafa lagt sig fram um að gera daginn gleðilegan. Yngri sonurinn tók það upp hjá sjálfum sér í gær að þrífa íbúðina og sá eldri vaknaði fyrr til að elda morgunmat og færa mér í rúmið. Ekkert er mikilvægara en að gleðjast með þeim.“
Athugasemdir