Anna Lísa Björnsdóttir, samskiptastjóri Vinstri grænna og fyrrverandi kosningastjóri flokksins, virðist pirruð á Stundinni ef marka má skrif hennar á Twitter. Fram til þessa hafa liðsmenn VG haft mætur á Stundinni. Andstæðingar blaðsins hafa jafnvel sakað blaðið um að ganga erinda VG. Ef Anna Lísa endurspeglar viðhorf innsta hrings VG þá er ljóst að það hefur kólnað á milli.
Ummæli Önnu Lísu féllu undir þræði Stefáns Óla Jónssonar, fréttamanns á Stöð 2, sem benti á að Morgunblaðið hefði blekkt lesendur í ritstjórnarpistli. Þar var Sigurður Már Jónsson sagður blaðamaður en í raun er hann starfsmaður þingflokks Miðflokksins.
Anna Lísa, sem er sérstaklega vottuð á Twitter, skrifar og segir Stundina ekkert skárri. „Ahh fleiri gera þetta,“ skrifar hún og deilir starfsmannaskráningu Jóhanns Páls Jóhannssonar, fyrrverandi blaðamanns á Stundinni og nú starfsmanni Samfylkingarinnar. Henni er bent á að Jóhann titlar sig ekki sem núverandi blaðamann og hafi ekki skrifað fréttir eftir að hann hætti.
„Segðu Stundinni þetta! Þau eru með hitt á heimasíðunni sinni!,“ segir Anna Lísa. Þá kemur Jóhann sjálfur og segir: „Það kemur nú ósköp skýrt fram á vef Stundarinnar hverjir vinna þar, en svo hanga auðvitað inni gamlar starfsmannasíður víða á á internetinu sem er hægt að dunda sér við að fletta upp.“
Anna Lísa stendur þó fast á sínu og segir: „Og öll vita sem fylgjast með auðvitað.“
Athugasemdir