Fyrstu niðurstöður íslenskra vísindamanna undir forystu Einars Stefánssonar, prófessor í læknisfræði við Háskóla Íslands, virðast benda til þess að fríar fitusýrur, sem er að finna í lýsi, eyðileggja kórónuveiruna á skömmum tíma. Ef þetta reynist rétt þá má segja að Íslendingar hafi haft lækninguna við COVID auðfáanlega í næstu verslun frá upphafi faraldsins.
Fiskifréttir greina frá þessu en Einar benti fyrst í mars á að lýsi gæti nýst í baráttunni við Covid-19. Rannsóknin nú var gerð af bandarískum samstarfsaðilum og sýndi hún að lýsi með bæði 1 prósent og 2 prósent hlutfalli af fríum fitusýrum hafi eyðilagt 99,9 prósent kórónuveirunar á um tíu mínútum.
Einar og samstarfsmenn hans hafa fengið samþykki vísindasiðanefndar fyrir rannsókn á áhrifum þessa efnis á menn. Innan skamms hefst rannsókn á Landspítalanum þar sem sýktum landsmönnum verður gefið lýsi með hærra hlutfalli frírra fitusýra.
„Við munum mæla hvort lýsið dragi úr veirumagni í munnholi og hálsi. Úrtakið er ekki stórt en nægir þó til þess að gefa vísindalegt svar,“ segir Einar í samtali við Fiskifréttir.
Athugasemdir