Nú þakka þeir ungu fyrir sig: „Fólkið sem deyr ber ör eins og þetta, það á betra skilið“

Ragnar Þór Pét­urs­son, for­maður Kenn­ara­sam­bands Íslands, segir að fólkið sem er í mestri hættu vegna COVID hafi fært fórnir fyrir okkur hin. Þau séu flest með ör líkt og sjá má á mynd­inni hér fyrir ofan, því þau bólu­settu sig. Það sé gott að hafa þetta í huga þegar fólk sé tregt til að bólu­setja sig.

„Ef þú ert með svona á upp­hand­leggnum eða bak­inu, takk! Ég er af fyrstu kyn­slóð­inni sem ekki þurfti að bólu­setja við bólu­sótt. Sjúk­dóm­ur­inn er enn ólækn­andi með öðru en bólu­setn­ingu en er útdauður ef honum verður ekki hleypt af stað aftur, t.d. í líf­einda­hern­aði. Þriðji hver sem sýkt­ist dó, hlut­fallið var hærra hjá börnum, og sjúk­dóm­ur­inn var með okkur a.m.k. frá dögum fara­ó­anna (og lík­lega í meira en 10 þús­und ár) til árs­ins 1977 þegar síð­asti ein­stak­ling­ur­inn veikt­ist,“ skrifar Ragnar á Facebook en færslan hefur vakið gíf­ur­lega athygli og flestir sem tjá sig eru sam­mála honum.

„Um miðja síð­ustu öld voru um 50 milljón smit á ári. Árið 1967 dóu álíka margir úr bólu­sótt og dáið hafa úr Covid á þessu ári. Á 3/4 hlutum 20stu aldar drap bólu­sótt ein­hvers­staðar á bil­inu 300 til 500 milljón manns. Á síð­asta 1/4 ald­ar­innar og fyrsta 1/5 tutt­ug­ustu og fyrstu aldar eru dauðs­föll núll.“

Ragnar segir að þetta fólk hafi ekki látið sér detta annað í hug. „Allstór hluti þjóð­ar­innar ber þess merki að hafa tekið þátt í að útrýma sjúk­dómnum til að vernda afkom­endur sína og sjálfa sig. Það er tákn­rænt að örið sést vegna við­bragða ónæm­is­kerf­is­ins, allir þræð­irnir í húð­inni uxu á þessum stutta tíma í sömu átt, ólíkt húð­inni í kring þar sem þeir snúa á alla kanta. Þannig hegðar líka ábyrgt sam­fé­lag sér, við snúum okkur öll eins í dálitla stund til að vernda okkur sjálf og hvert annað,“ segir Ragnar.

Hann biðlar því til lands­manna að gefa þeim það í jóla­gjöf að lág­marka hætt­una og bólu­setja sig við fyrsta tæki­færi. „Verum stolt af fórn­unum sem við þurfum að færa. Hegðum okkur nú ábyrgt á aðvent­unni og á vor­mán­uðum og förum var­lega, bólu­setjum okkur þegar við getum. Ein bylgja enn getur og mun kosta manns­líf. Það er nokkuð víst að fólkið sem deyr ber ör eins og þetta á mynd­inni. Það á betra skilið frá okkur. Reynum að gefa því þá jóla­gjöf að lág­marka hætt­una.“