Ragnhildur Kolka, bókmennta- og lífeindafræðingur, fullyrðir að frelsi til tjáningar sé ekki hátt skrifað á spjalli Pírata hér á landi. Þar hafi hún verið kölluð ýmsum ljótum nöfnum á sama tíma og kommenti hennar sem innihélt gagnrýni á grímuskyldu hérlendis vegna Covid-19 var eytt út af spjallinu.
Það er Guðmundur Franklín Jónsson, fyrrum forsetaframbjóðandi, sem vekur athygli á skrifum Ragnhildar en hún segist hafa verið kölluð belja, djöfulsins drullusokkur, dóni og lygari á Píraspjallinu á Facebook án þess að slíka athugasemdir væri fjarlægðar. Þegar hún sjálf vogaði sér að gagnrýna grímuskylduna hafi pósti hennar verið eytt út. „Ég veit ekki hvað skal segja, hugleysi eða heimska? En eitt er víst að frelsi til tjáningar (aðrar skoðanir) er ekki hátt skrifað á spjalli Pírata,“ segir Ragnhildur.
Ljóst er að Ragnhildur er ekki ánægð með þær sóttvarnaraðgerðir sem viðhafðar hafa verið hér á landi í faraldrinum. Í þriðju bylgjunni sem nú stendur yfir bloggaði hún um aðgerðirnar. Þar segir Ragnhildur meðal annars:
„Hér á landi hefur stefnan frá upphafi verið að loka á pestina. Fyrst hét það að lækka kúrfuna en smám saman hefur þessi ásetningur vikið fyrir verkefninu að halda landinu „veirufríu“. Allir sótraftar dregnir á flot til að verja afstöðu 3ja manna nefndar sem engin hefur kosið. Sagt er að við séum nú í 3ju bylgju, en eins og yfirvaldið lætur erum við alltaf í nýrri bylgju í hvert sinn sem smitaður einstaklingur kemur inn í landið. Og nóg er af smituðum á landamærum. Íslendingar búsettir eða í námi hafa snúið heim með sín smit, erlendir starfsmenn og svo náttúrlega „hælisleitendur“ sem alltaf er tekið opnum örmum sama hvaða smit þeir bera með sér,“ sagði Ragnhildur og bætti við:„En stíflan er að bresta. Sem betur fer er rödd skynseminnar loksins farin að heyrast. Að utan auðvitað, því hér hefur hún verið kæfð með upphrópunum um fjöldamorðingja sem flýta vilja fyrir dauða ömmu og afa.“
Athugasemdir